2425/2024-2025

Dated Hnahthial, the 8th October, 2024: Vawiin chawhma dar 11:00 khan Horeb Conference Hall, Hnahthial District-ah Mizoram Journalist Association (MJA) General Headquarters leh Home Department tangkawpiin an buatsaih – “One Day Seminar on Cyber Crime Programme” chu South Tuipui bialtu MLA, Pu Jeje Lalpekhlua chuan khuallian niin a hmanpui.

Khuallian, Pu Jeje Lalpekhlua chuan tunlai khawvela kan mamawh tak mai- ‘Cyber Crime’ chungchang inzirtirna hun hman a ni thei chu lawmawm a tih thu sawiin MJA leh Home Department hmalakna chu fakawm a tih chu a sawi a. Tunlaiah chuan Social Media hian thil a tihtheih tawh zia sawiin a tha lama hman theihna a tam rualin a chhe lama hman a awlsam zawk fo thu a sawi a. Fake account siam a midang pawi sawi leh sawi loh ngaihtuah lova duh duh sawi an tam thin chu pawi a tih thu sawiin dan ang hial pawha thubuai awrh theihna awlsam tak anih avangin mipui chu kan fimkhur tlan a tul thu a sawi a. Inbumna lakah kan filhlim theih nan social media leh internet facilities hrang hrangte chu mitin ten fimkhur taka hmang thin tura a duh thu sawiin inhrihhriatna tha zawk khawtlang leh mimal in theuhvah a awm a pawimawh thu a sawi a ni. 

Kalkhawm MJA member ho hnenah thu sawiin Journalist ho chu sawrkar leh mipui inkar zawmtu pawimawh tak an nih thu a sawi a. Media hi a la pawimawh chhoh tulh tulh dawn avangin sawrkar leh journalist ho inkarah thawhhona tha tak a awm zel a beisei thu a sawi bawk.

Seminar hi Pu C. Lalrambuatsaiha, President, MJA, Hqtrs chuan kaihruaiin inlawmna thusawi Pu F. Zosangliana, Hnahthial District MJA President hnen atangin ngaihthlak a ni a. Report tawi, Pu K. Zothanpara, General Secretary, MJA Gen. Hqrs. leh Pu V.L. Liansanga, Secretary, Hnahthial District MJA hnen atanga ngaihthlak niin Pu Zonunsanga, Addl. SP, CID Crime chuan Cyber Crime chungchanga hriat tur hrang hrang zirtirna a pe a ni.

He seminar hi nimin, October ni 7,2024 khan Serchhip District-ah bialtu MLA leh Chief Minister ni bawk, Pu Lalduhoma chuan hawnna hun a nei a. Seminar hi District tina neih tura ruahmanna siam niin Hnahthial District zawh hian Lawngtlai District-ah neih leh tura ruahman a ni.