Vawiin khan East Tuipui bialtu MLA Pu T. Sangkunga, MYC Chairman, chuan VAGY Scheme hnuaia Model Village atana a thlan, Khuangthing khaw mipuite tan Free Mobile Health Clinic a buatsaih a. Mamawhtute tan damdawi a thlawna sem a ni bawk. MLA hi Champhai District Bawrhsap Pu Vanlalngaihsaka IAS leh DRDA Project Director Pu C. Lalchhuangkima bakah District official dang - SE (PHE), CMO, DI&PRO, DEO, Medical Superintendent leh Medical Officer 4 bakah Khawbung RD Block atangin BDO, CDPO, PHE leh P&E hotuten ten an tawiawm a ni.

Free Mobile Health Clinic hawnna inkhawm hi Khuangthing Community Hall-ah neih niin East Tuipui bialtu MLA, MYC Chairman ni bawk Pu T. Sangkunga chuan Khuangthing khua chu khaw taima tak, hmalakpui phurawm tak ni mahse khawdangte aia ram nei zim leh hnufual a la nih avangin District hotuten kawng hrang hrangah duhsak bik thin se a duh thu a sawi a. Khuangthing chu Mizorama kalkawng nei tha berte zing a mi a ni tiin MYC Chairman chuan hmasawnna ruhrel pawimawh ber Power pawh kum 2017 atang chuan Tlawva Hydel Project atangin hnianghnar takin an hmuhthei dawn a ni, a ti bawk. Pu T. Sangkunga chuan a Model Village khaw mipuite chu an hriselna enkawl uluk tura chahin exercise lak uar tur leh tuiin tam turin a fuih a. Khuangthing khua chu Model Village a thlan a nih avangin sum tam taka vur a ni nghawt dawn lo tih sawiin East Tuipui bialtu MLA chuan, "VAGY Model Village chu sawrkar hmalakna tur apiangah duhsak hmasak an ni ang," a ti bawk. MLA chuan Free Clinic chhawr tangkai tura mipuite chahin, Champhai District doctor tha ber ber te Khuangthing khaw mipuite tan a thlawna rawn theih tura an awm chu lawmawm a tih thu a sawi bawk.

Free Clinic hawnna inkhawm hi Champhai District Bawrhsap Pu Vanlalngaihsaka, IAS in a kaihruai a. Khawbung RD Block BDO Pu James Lalnithanga, Charge Officer, Khuangthing VAGY Model Village ni bawk chuan an hmalakna tlangpui leh an hlawhtlinna tlangpui a report a. Khuangthing VCP pawhin Model Village atana thlan an nih vanga lawmthu sawiin Model Village tana tih tur awm ang ang te tihlawhtling tura hmalak zel an tum thu a sawi bawk. DRDA Project Director Pu C. Lalchhuangkima chuan lawmthu sawina leh Khuangthing khaw mipuite fuihna in hun a khar a ni.

Hawnna program zawh veleh hian Khuangthing middle school ah Champhai District CMO leh Medical Superintendent hovin doctor specialist pali ten a thlawna in entirna an buatsaih nghal a, damlote mamawh angin damdawi a thlawna sem nghal a ni bawk. Free clinic hi mipuiten an hlut em avangin Medical Team-te OPD card ken sa pawhin a daih lova, tlai dar 2 vela Registration khar a nih thleng khan inentir duh mi tam tak an la awm a ni. Free clinic hi Khuangthing khaw mipui bakah Khawbung leh Zawlsei atangte pawhin mi tam takin an chhim ve a ni.

MLA Pu T. Sangkunga hovin District official-te leh khawtlang hruaitute hian VAGY Model Village thil tum tihhlawhtlinna kawnga an thlen chinte sawi hovin hmalakna turte an duang a. Rilru lama harsatna nei leh kum upa tlemte tihloh khaw mipui zawng zawngten ziak leh chhiar an thiam vek tawh thu te, naupang school kal rual zawng zawng school-a admit vek an nih thu te, Vaccine la thei zawng zawngin vacine an lak vek thu te, chhungkaw tinin bank account an neih vek tawh thu te, nau piang/mi thi/innei thar zawng zawng regjster vek an nih thu te leh Khuangthing khua chu Open Defecation Free (dai leh khawlaia inthiar awm lohna) a puan a nih tawh thu tarlan a ni a. VAGY leh MGNREGS convergence atangin vantlang tan bawlhhlawhbawm, zunin leh tui zem te siam a ni tawh bawk. Khuangthing khua chu vaihlo leh plastic bag hmanglo khua ni tura tan lak mek a ni bawk. Intinin tui hnianghnar an dawn theih nan hmalak a nih bakah ranvulh zawng zawng pawh vaccine pe vek tura hmalak a ni bawk. Khuangthing khaw bawlhhlawh paihna hmun (Dumping Ground) tlawhin a thlakna tur hmun en nghal a ni bawk.

MYC Chairman Pu T. Sangkunga leh Sawrkar official-te hian Khawbungah Green Mizoram Day pualin tukin zingkarah khan thingtiak an phun bawk.