3381/2024-2025

Dated Hnahthial the 5th December, 2024: Vawiin khan NABARD, Public Asset Committee Pangzawl South, AMFU Welfare Foundation ten an thawh khawm sum, cheng nuai sawmthum pakhat (Rs. 31 lakhs) senga sak, Pangzawla “Chawngvungi Market” chu HPC Vice Chairman Pu V. Malsawmtluanga, MLA chuan khuallian niin a hawng a. Pi Chiinngaihkim Phiamphu, District Development Manager (DDM) NABARD Lunglei chuan khual zahawm niin a hmanpui bawk.

Khuallian HPC Vice Chairman Pu V. Malsawmtluanga, MLA chuan thu sawiin Chawngvungi Market hawng theia a awm chu lawmawm a tih thu a sawi a. Kuthnathawktute hamthatna tur ngaihtuah chungin budget-ah pawh sum dah thin anih thu sawiin tunah chuan a hlawhtlinna lawmawm tak kan hmu chho tan ta mek zel a ni a ti a. Mizote hi hnam taima kan nih thu sawiin market that lohna hi kan buaina lian ber anih thin thu a sawi a. Market a that chuan kut hnathawktute thawrimna a lothlawn tawh dawn lo a ni tiin chumi atan chuan tan nasa taka an lak thu sawiin tunah pawh hmasawnna kan hmu mek zel a ni a ti.

HPC Vice Chairman chuan vawiin hi World Soil Day a nih thu sawiin thupui atan pawh “Caring for soils: measure, monitor, manage” tih a nih thu a sawi a. Kan leilung luangral hi a uihawm hle a ni tih hria a, humhalhna kawnga tang kan lak pawh a tul thu sawiin chemical fertilizer hmang lova mipuite hriselna atana organic fertilizer hmang thin turin a chah bawk. Chawngvungi Market chu kuthnathawktuten tangkai taka an hman a besei thu sawiin a nghaktute pawh thianghlim tak leh uluk taka enkawl turin a chah nghal bawk a ni.

He hunah hian Pi Chiinngaihkim Phiamphu, District Development Manager (DDM) NABARD Lunglei pawhin thu sawiin Pu Joseph H. Thanzuala, Director AMFU Welfare Foundation chuan AMFU Welfare Foundation kalphung te, an hnathawh te leh tuna Chawngvungi Market an sak dan report te a tarlang a. Pu R. Lalrinawma, VCP Pangzawl South pawhin thusawina hun hmangin Er. Mimi Zohmingliani, Technical Assistant, AWF in lawmthu sawiin hun a khar a ni.

Chawngvungi Market hi NABARD Gramaya Vikas Nidhi (GVN) scheme hnuaia sak niin, NABARD leh AMFU Welfare Foundation (AWF) leh Public Asset Committee Pangzawl South ten a sakna tur pawisa an intum sem a. NABARD in cheng nuai sawm panga (Rs 15 lakhs), AMFU Welfare Foundation (AWF) in cheng nuai (Rs 2 lakhs) leh Public Asset Committee (PAC), Pangzawl South in cheng nuai sawm pali (Rs 14 lakhs) theuh an tum a. A vaia thawhkhawm hi cheng nuai sawmthum pakhat (Rs 31 lakhs) a ni.

Chawngvungi Market hi concrete a sak niin, thlai thar zuartu mi 30 te nuamsa taka an inpho theihna tura duan a ni a. A dung feet 60 leh a vang feet 15 a zau a ni a. Market-ah hian store room zau tha tak (24x15) te, bathroom pahnih te, septic tank tha tak te leh tea stall tur te sak tel a nih bakah tui connection leh tui dah khawlna (syntax) litre 3000 dawngte dah niin bawlhhlawh leh tuichhe paihna felfai taka siam a ni bawk. Chawngvungi Market sak hna hi 13 December, 2023 ah tan niin 22 November, 2024 khan sak zawh a ni.