3382/2024-2025

Saitual, the 5th December 2024: Vawiin khan Mission Shakti hnuaia hmeichhiate chunga hleilenna titawp tura ni 16 chhung campaign kharna inkhawm chu Multi-purpose Shopping Complex Conference Hall Saitualah neih a ni a, Pu V. Laldinsanga, Project Director, District Rural Development Office, Saitual chu khuallian niin hun a hmanpui.

Khuallian chuan ni 16 chhunga Saitual District huam chhung khaw 7 ah Mission Shakti hnuaiah hmeichhiate hmasawnna leh himna tura inzirtirna (awareness) kalpui a ni chu hmasawnna lawmawm tak a ni tih a sawi a, ramin hma a sawn dawn chuan hmeichhiate an hima hma an sawn a ngai a ni, a ti. Pu V. Laldinsanga chuan hmeichhiate dinhmun chawi kan a pawimawh hle tih sawiin, India rama state dangte ngaihtuah chuan Mizo hmeichhiate chu an vannei hlea a hriat thu a tarlang bawk. Tunhma chuan mizote pawhin hmeichhia an dahhniam thin a ni, a ti a, khatiang hun kha Mizote chuan kalsan mekin, zirna leh kawng hrang hrangah mipate tluk loh hmeichhia an tam ta a, mipa tih theih tam tak an ti thei ta hi hmasawnna a ni, a ti. Khuallian chuan hmeichhia chu pianphungah mipa aia chak lo zawk an nih avangin kutthlak, pawngsual leh hetiang lam hleilenna awm thin erawh thil pawi tak a ni a tih a sawi a, chumi tireh tur chuan awareness kalpui deuh deuh turin kalkhawmte chu a fuih a. Mission Shakti hlawhtlinna Saitual District-ah a thlen zel theih nan kalkhawmte chu duhsakna a hlan a ni.

He hunah hian Line Department intihsiaka titha ber SDEO Office, Saitual chuan khuallian hnen atangin lawmman an dawng a. Vawiin inkhawm hi Pi Mary Malsawmkimi District Mission Coordinator (DHEW) chuan kaihruaiin Pi Lalramhlui, Gender Specialist (DHEW)  chuan Mission Shakti thil tum leh kalphung tlangpui a sawifiah a, hun tawpah Pu Samuel Lalremruata, Accountant cum DEO for PMMVY (DHEW) chuan lawmthu sawiin hun a khar a ni.