565/2026-2027

Vawiin khan Hmar Martarte Ni vawi 36-na chu Manipur-a Churachandpur Saikawt Playground-ah hman a ni a, Speaker Pu Lalbiakzama chuan khuallian niin a hmanpui. He hunah hian a vawi 19-na atan Hmar Martyr's Trophy khelh a ni bawk. Hmar mipuite hnenah thuchah sawiin Speaker chuan Hmar Martarte inhlanna chu hnam rohlu leh hriatreng tlak a ni tiin, Martarte thisen hian hnam nunna, zahawmna leh inpumkhatna a siam, a ti.

Speaker chuan ram leh hnam humhalhna atan an nunna hlantu Martarte chu a chawimawiin, zahna chibai a buk a; martarte inhlanna chu thuin sawi kim theih a ni lo va, an thisen leh an inhlanna hian hnam nunna, zahawmna leh inpumkhatna lungphum a siam tih a sawi. Martarte chu hriatrengna mai ni lovin, hnam rohlu an ni a, an inhlanna hian thangtharte thinlungah huaisenna, inpumkhatna leh ram hmangaihna a tuh tih a sawi bawk.

Speaker chuan Hmar hnam leh Mizo identity inzawmna pawimawhna a sawi chhuak a, Hmar hruaitute leh Organization ten Mizo/Zo inpumkhatna an ngai pawimawh chu lawmawm a ti. Manipur-a Hmar organization ten Mizo/Zo identity reaffirmation an tih chu Zo hnahthlakte inpumkhatna leh hnam nunphung humhalhna kawngah thil pawimawh tak a ni, a ti.

Mizoram sorkar leh HPC-D inkara remna thuthlung tluantling siam a ni tawh chu lawmawm a tih thu Pu Lalbiakzama chuan a sawi a, April ni 30, 2026-a HPC-D ten ralthuam an tun chu Mizorama remna leh muanna dinnghehna tur atan hmasawnna pawimawh tak a ni, a ti. Ralthuam kenga rammut a tawp ta hi lawmawm a tih thu leh he remna hian inpumkhatna leh hmasawnna a tihchak dawn thu a sawi bawk.

Manipur-a chi leh chi buaina chungchangah Speaker chuan Zofa unau ten harsatna leh tawhna nasa tak an hmachhawn mek chu lungngaihthlak a tih thu a sawiin, Zofa/Mizo zawng zawngte chu inpumkhatna leh inunauna vawng nung zel tura ngen a, tawng hrang leh identity hrang nei mah se Mizo/Zo identity chuan min khungkhawm vek tih hre reng tur leh mahni culture leh identity vawng chungin inpumkhat zel turin a chah a ni.

Speaker chuan  thangtharte chu Martarte nunin min zirtir angin huaisenna, rinawmna, thawhrimna, thuhnuairawlhna, mi dang hmangaihna leh ram leh hnam tana inhlanna nei turin a fuih. Hmar Martarte thisen hian Zofa zawng zawngte chu remna, zahawmna leh hmasawnna kawngah min hruai zel ka beisei, a ti.

Vawiin Programme hi Rev.Timothy Lalzuimawii chuan ṭawngtainain a hlan a ni a, Martarte hriatrengna atan tawngtaina hun Pi Lalrothar chuan a hmang bawk. EFCI, Saikot Presbytery Superintendent, Rev. Lunzamanga'n tawngtaiin hun a khar a ni.

He hun hi MLA Pu V. Malsawmtluanga, Vice Chairman leh High Power Committee ni bawk te, Hmar Inpui hruaitute, Hmartob hruaitu te, Martar chhungkua te, Pu Ricky Lalremsanga, CEM of Shinlung Hills Council, Council Member Pu Lalvenhima Hmar leh Pu Vanlalsiamsanga ten an hmanpui a ni.