3333/2023-2024

Dated Aizawl, the 12th January, 2024: Vawiin tlai khan Assembly Secretariat Conference Hall ah Mizoram Legislative Assembly members te tana ni thum awh Leadership Innovations Training; Assembly Secretariat leh Administrative Training Institute (ATI) te tangkawpin an buatsaih kharna inkhawm neih a ni a. Chief Minister Pu Lalduhoma chuan khuallian niin a hmanpui.

Thusawiin khuallian chuan, Mizoramin Administrative Training Institute changtlung tak a nei leh Mizo resource person thiam leh tha tak tak a nei chu lawmawm a tih thu a sawi a. Engemaw harsatna avanga tel thei lote pawh study material pek vek an ni dawn a, ruahmanna a fel hle a ni. Karleh lamah training hi Delhi lama chhunzawm leh tur a ni a, chutah pawh chuan tel theih vek tum ila a tha hle ang. Training min buatsaihsak chhan hi thil dang atan nilovin legislator tha kan nih theih nan a ni a, kan ram a ni. A zir zui peih leh peih lote kan inthlau thei viau pawhin a rinawm. Tin, tunlai khawvelah technology a san tawh avangin tunlai thil thar ber ber man phak kan nih a ngai a, chutiang tura kan inbuatsaih zel chu a pawimawh a ni, tiin training chhimtute a ngen a ni. Tun hma atanga legislator tha nih tuma a lo beih tawh dan te hrilhin kum tam tak chhung sawrkar department te a zir reng thu a sawi a, vawiin thlenga file a la pending ngai loh thute pawh sawiin, "File ka ngah leh zan ka mengrei a ni mai a, file chin fel loh nei chungin ka mutui thei lo" a ti. Chief Minister hian legislator tana thawhrim a pawimawhna te, zir peih a tulzia te leh thil thlir thiam a hlutzia te a tarlang bawk a ni.

Trainee te aiawhin Pu K. Sapdanga, Home Minister chuan thu a sawi a. Training buatsaih saktu leh resource person te chungah lawmthu sawiin ni thum chhunga an thil zirte a zau hle a, kan zir zawng zawngte kan hre bel hman vek lo mai thei. Mahse kan training hian legislator ni tura hriattur lo tamzia te min hriattir a, kan hlawk hle a ni. Karleh lamah he hmuna training te tho hian Delhi lamah training bawk hi kan chhunzawm dawn a, kal vek kan tum a ni, a ti. Training neih fo a hlawk dawna a hriat thu a tarlang bawk.

Pu Lalbiakzama, Speaker chuan a kharna thusawiin, training a hlawhtlin theih nana mawhphurhna hrang hrang neitute chungah lawmthu a sawi a. Pi Maria CT Zuali, Director, ATI leh a thawhpuite inbuatsaihna te, resource person te inbuatsaihna te a tha tak zet a ni, a ti.

Inkhawm kaihruaitu Dr. Renu Sharma, IAS, Chief Secretary pawhin training an buatsaih chhan leh a pawimawhna te a sawi a ni.