Vawiin khan Mizoram Legislative Assembly-a MLA te tan Information Communication Technology Department chuan Information Communication Technology chungchangah zirhona Training programme Legislative Assembly Conference Hall-ah an buatsaih.

He zirhona programme ah hian Assembly Speaker Pu Hiphei, Cabinet Minister - Pu R. Lalzirliana, Pu R.Romawia, Pu Lalsawta, Pu H.Rohluna, Pu Zodintluanga, Pu John Rotluangliana, Pu P.C.Lalthanliana te; Minister of State - Pu Lal Thanzara, Pu Lalrinmawia Ralte, Pu Ngunlianchunga Dr. B. D. Chakma te ; Assembly Deputy Speaker Pu R.Lalrinawma; Parliamentary Secretary – Pu K.S. Thanga, Lt. Col. (Retd.) Z. S. Zuala, Pu H. Zothangliana; Pu Joseph Lalhimpuia, Pu T.T. Zothansanga, Pu K. Lalrinthanga, Pu Hmingdailova Khiangte te bakah MLA dangte an tel kim hle a ni.

ICT Minister Pu Lal Thanzara chuan khawvel thang zelah IT leh hmanna hi a tamin a pung chho zel a, mipui aiawh a thlan MLA te hian hemi chungchang hi kan hriat a, eng tinge IT hi inrelbawlna tha hlenchhuah leh rorelna tha thlenna kawnga tangkai zawka kan hman theih ang tih ngaituahna kan neih tlan theih nan zirho leh sawiho hi buatsaih a nih thu a sawi.MLA kalkhawmte hian IT hmang hian mipuiin Sawrkar chu awlsam zawka an dawr theih thu leh hemi hian inrelbawlna leh rorelna tha zawk a thlen thei thu te sawiin IT lamah hian chak leh zawka hma lak tha an tih thu te an sawi tlang a ni.

ICT Department Secretary Pu C.Lalhmachhuana leh Pu Lalthlamuana, Chief Informatics Officer, ICT Department te chuan Information Technology hmanga Sawrkar inrelbawlna tih changtlun leh chumi atanga mipui ten awlsam zawka government service an mamawh hrang hrangte Sawrkara an dil leh dawr theih dan chipchiar takin MLA kalkawmte chu an hrilh hria a, ICT chungchanga MLA te zawhna an chang bawk a ni.