Information Communication Technology Department enkawltu Minister Pu Lal Thanzara chuan vawiin chawhnu khan ICT Department a tlawh a, ICT Department leh National e-Governance Project (NeGP) hmalakna a din – Mizoram State Data Centre (MSDC), Mizoram State Wide Area Network (MSWAN) leh Mizoram State e-Governance Society(MSeGS) office te a fang kual a ni.

ICT Department building-a MSeGS office a tlawhnaah Pu Lal Thanzara chuan ICT Department chu Department chhuanawm tak anih thu te leh MSeGS a thawk Mizo thalai IT lama thiamna sang tak tak nei 20 chuang an awm chu lawmawm leh chhuanawm a tih thu te a sawi a ni.

NeGP hnuaia project kalpui mekte hi district leh block headquarter zawng zawng te Aizawl nen inthlunzawmna Mizoram State Wide Area Network (MSWAN) te; Sawrkar leh Department hrang hrang ten an Data dah thatna leh IT hmanga an service hrang hrang mipui hnenah an pek te vawnna State Data Centre (SDC) te; Common Service Centre leh Rural Information Kiosk te; State Service Delivery Gateway (SSDG) leh State Portal (SP) te leh e-District te an ni.

MSWAN hi July 2012 khan hawn niin State Data Centre hi tun ah la hawn chiah nilo mahse a takin hna a thawk tan tawh, hun reilote ah, a hawnna programme neih beisei a ni. Mizoram khawpui hrang hrangah hian Common Service Centre 136 din tura ruahman niin engemaw zat chu din ni tawhin hna pawh an thawk tan tawh a. Thingtlang lamah chengte pawhin awlsam zawka sawrkar an dawr theihna tur Rural Information Kiosk 300 vel ruahman niin heng zingah 240 te chu thlan fel a ni tawh a, a khawl pawh pek an ni tawh. CSC leh RIK te hi a veng leh khaw mi thlanchhuah ten an enkawl mekin an tan eizawnnna kawng tha tak ni thei tura beisei a ni.

State Portal hi mipuiin awlsam zawka government service hrang hrangte an dil theihna tur leh hengte hi hmun khata dahkhawmna a ni. e-District hi IT hmanga mipuiin awlsam zawk a DC in a pekchhuah certificate hrang hrang te, Ration Card chungchangte, LSC kaihhnawih form chungchang te an office a kal kher lova dil dan ruahmanna niin a Pilot Project hi May 2012 khan tan a ni.

Mizoram State e-Governance Society hi ICT Department hnuaia hmalakna hrang hrang puitu leh enkawltu atan din niin Society hi Sawrkar atanga tanpuina dawng lovin an hnathawh chhuah atanga in tum ve Society a ni a. Tunah hian Planning & Programme Implementation Department, Secretariat Administration Department leh Tourism Department te hman atan software an siam sak mek a ni.

ICT Department hian hmachhawp lian tak pahnih a nei a chhungte chu - World Bank project vaibelchhe 72 man hu ‘Improvement of Government’s administrative processes and quality of service delivery mechanism in Mizoram’ tih leh vaibelchhe 10 man hu e-Bharat project te an ni a. Heng project 2 hmang hian IT hmanga Sawkar inrelbawlna tihchangtlun leh Department hrang hrang te kalphung tha zawka siam tum a beisei a ni. e-Bharat bik ah hian Department thlanchhuah 33 te service hrang hrang 100 vel fuankim beisei a ni.