Mizoram Maxicab Owners Association hruaitute leh Transport Minister Pu John Rotluangliana chu vawiin khan a pisaah an inkawm.

Pu John Rotluangliana chuan Maxicab neitute chu Mizoram dung leh vang fang chhuaka, mipuite tana hna an thawhna kawngah an passenger te nunna an kutah a awm tih hriaa, an driver-te pawhin tun aia fimkhur lehzuala motor an khalh tul a tih thu a sawi. Maxicab leh taxi permit hralhchhawn tam lutuk leh motor hman tlak tawhlo khawpa hlui leh chhia pawh an permit a thi hlei theilo thin chuan harsatna a siam avangin ennawn a ni dawn, Transport Minister chuan a ti a. Thu leh awm hma chu Maxicab leh taxi permit thar pekchhuah leh a hlui thlak (replacement) chu tihtawp rih a nih tur thu a sawi. Transport Minister chuan Aizawl tlawha Maxicab service tam tak an awm laia, District khawpui leh khawpui lian deuh dangte inkara tlan thin an tlem viau chu mipui tan harsatna a thlen nia a hriat thu a sawi a. Aizawl khawpui kaltlang kher lova District khawpui leh khaw lian dangte kawk zawnga Maxicab tam zawk tlan tul a tih thu Pu John Rotluangliana chuan a sawi bawk.

Maxicab Owners Association hruaitute chuan diesel man leh motor part man sang zel avangin harsatna an tawk tih sawiin Maxicab ticket man ennawn an duh thu Minister hi an thlen a, State Transport Authority (STA) thutkhawm hmasak bera ngaihtuah tura chhawp chhuah a nih tur thu Pu John Rotluangliana chuan a hriattir. Maxicab-te tana terminal siam chungchanga an ngenna pawh chhangin Transport Minister chuan sorkar laipuia thehthlak tura DPR buatsaih a nih thu a sawi bawk.