Lai Autonomous District Council(LADC) huam chhunga Village Council 93 inthlan buatsaih dan tur chungchang ah vawiin khan Pu H.Darzika, Secretary, State Election Commission(SEC)leh mi pawimawh dangte SEC Secretary office ah an thukhawm a. LADC huam chhunga VC 93 inthlan hi March thla chawhnu lama neih turin ruahman a ni.
He VC inthlanna neih tur ah hian Lai Autonomous District Council (Village Councils) (Amendment)Act, 2011, Amendment of Section 3 in ‘VC seat awm zawng zawng atanga seat khat aia tlemlo chu hmeichhe tan hauhsak tur’ tia a dah chu a taka hman a ni dawn a. Mizorama VC inthlanah hmeichhe tan seat hauhsakna hmasa ber a ni dawn a ni. Hmeichhe tana seat hausak bik chuhtu te tan ballot paper leh ballot box pawh a hranpa a siam turin ruahman a ni.
Vawiina meeting ah chuan VC inthlanna atana venhimna kalpui dan tur leh ruahmanna hrang hrang siam dan tur te rel a ni a. A tul dan angin LADC thuneitute leh political party aiawhte nen heng ruahmanna te hi thlir ho leh tur a ni.
