2111/2026-2027
Saitual, the 8th September, 2026: National AIDS Control Organisation (NACO) chuan India ram pumah Mobilization AIDS Suraksha (MAS) campaign a buatsaih a, chutah chuan district/state in 95-95-95 goal phak a ngai a, Saitual District chu Mizoram pumpuia Surakshit status kai pha awmchhun a ni.
1st 95 hi estimate atangin HIV kai zawng zawng 95% ten an HIV status an hre tur a ni (diagnosed an ni tur a ni).
2nd 95 hi chung HIV+ hmuhchhuah zinga 95% in ART damdawi an ei tur a ni.
3rd 95 hi ART damdawi ei zinga 95% in viral load suppression an nei tur a ni.
MAS-ah chuan district-te 95-95-95 status azirin heti ang hian an then hranga:
1. Sangharshee (95 pakhat emaw engmah la pha lo)
2. Saksham (95 pahnih pha tawh)
3. Surakshit (95 pathum pha vek)
4. Surakshit+ (HIV+ nu in a naupai a kaichhawng lo - zero mother to child transmission)
Hemi goal pha tur chuan HIV inkaichhawnna darh nasa zel tur (chain of transmission) hi tihtawp (break) theih beisei a ni a. He MAS campaign hi February thla atang khan ngawrh takin kalpui a lo ni tawh a. District tinah DC hova hmalak dante relin hmasawnnate enho a lo ni thin a. August report lutah khan Saitual District chuan Surakshit status a kai thei ta a, Mizoramah chuan a kai thei awm chhun a la ni.
Dr. Zothanpari Chhakchhuak, Dy. CMO chuan hetiang dinhmun an thlen theih nan District Bawrhsap Pu Srinivas Sadi atangin puihna an dawng nasa tih a sawi a, khawtlang hruaitu (NGO) te leh kohhran hrang hrangte nen thawhhona tha tak neiin, thisen test leh awareness campaign neih chungchangah pawh an inhawng em em a, an chungah lawmthu a sawi bawk a ni. He dinhmuna awm reng thei tur chuan a tam thei ang ber thisen test a, mahni dinhmun inhriat a pawimawh tih a sawi a, HIV +ve ten ART damdawi tha taka an ei zel a pawimawh bawk a ni, a ti.
