Nimin khan Champhai North Bialtu MLA, Pu T.T. Zothansanga, Parliamentary Secretary ni bawk chuan a bial chhunga Model Village atana a thlan, Rabung khua cheibawl dan tur chungchang ngaihtuahin Khawzawl SDO(C) Pu Lalrinzuala Office Chamber-ah Project Director DRDA Pu CC Lalchuangkima leh Sorkar Department hrang hrang hotute bakah tlawmngai pawl hrang hrang leh khawtlang hruaitute an thukhawm.

He hunah hian Parliamentary Secretay Pu T.T. Zothansanga chuan Rabung khua Model Village a thlan anih chungchangah hian hmalakna hlawhtlinna tur chu Sorkar Department hrang hrangte thawhhonaah a innghat tih sawiin Department hrang hrang te chu inlungrual tak a thawhhopuiah a sawm a ni.

Nimin meeting-ah hian Model Village atana ruahmanna hrang hrangte sawiho a ni a. Rabung leh khaw chhehvel khaw hrang hrang inkar kawng siam that te, Rabung PHC thuam that leh tih changtlun dan te, Zawlnghak Sial Farm ti changtlung tur a hmalak dan turte; Power & Electric Department kaihhnawih Rabung khaw mamawh hrang hrang tihchangtlun dan te, Rabung a leilet neitu mi 85 te tana Agriculture leh Horticulture Department ten a tul anga hma an lak dan turte; PHE Deptt. in Rabung khaw tuilakna leh khawchhunga sem dan tur tha zawk an neih theihna tura hmalak dan tur te leh Rabung khua cheina tur a tul hrang hrangte an sawiho a ni.

Saansad Adarsh Gram Yojana hnuaia MLA tin ten an bialchhunga Model Village tur an thlan chhuah hi Khawzawl R.D. Block huamchhungah hian khaw 3 - Champhai North Constituency Model Village Rabung, Tuichang Constituency Model Village Chawngtlai leh Hrangturzo Constituency Model Village Biate te a awm a ni.