Vawiin hian Lawngtlai DC Conference Hall ah Independence Day 2015 hman dan tur Bawrhsap Pu J. Hmingthanmawia hovin ngaihtuah a ni a, chanvo pawimawh chi hrang hrangte sem nghal a ni.

Pu J. Hmingthanmawia chuan, hun kal tawhah Department hrang hrangte leh Council sawrkar thawhhona tha tak avangin sawrkar ni pawimawhte hi fel takin kan lo hmang tawh thin a. Kumin a Independence Day lo thleng leh tur pawh chutiang bawka beia, a hlawhtlin theih nana tih tur kan insemte tha taka hlen chhuak leh theuh turin kan in ngen a ni tiin Department te leh Council sawrkar te chu a ngen a ni.

Independence Day hmanna hmun atan Central YLA Playground chu ruat a ni a, zing lam dar 10:30 ah tan ni se, chawhnu lam dar 2:00 ah at Home Tea Party Circuit House ah neih nise tiin rel a ni. Hei bakah hian Parade Contingent awm zat turte, Independence Day pual Football inelna buatsaih dan tur te, Hospital leh Hnuchham in tlawh dan turte leh thil tul hrang hrang chhawpchhuahte chu ngaihtuah nghal a ni a. Technical Sub Committee leh Parade Committee pawh din an ni bawk.