Nimin  khan NLUP Implementing Board Chairman leh Champhai South Bialtu MLA ni bawk Pu JH Rothuama chuan Kelkang a tlawh.

Kelkang harhna chhim tura mikhual thahnem tak an awm thin avangin, Kelkang khaw mipuiin mahni chhungkaw hna thawk hman lova, mikhual an enkawlna avanga harsatna thleng theite leh vantlang hriselna atana sorkarin hma a lakna te Pu JH Rothuama chuan en in, Kelkang Revival Managing Committee-te nena hmalak mek leh kalpui zel dan tur a sawipui a.  DC leh Kelkanga Sorkar hmalaknaa Department kaihhnawih - PHED, P&ED, AH & Veterinary Department leh UD&PA te bakah tul tul thawk tura thawhhona tha tak a awm chu lawmawm a tih thu a sawi bawk.

NIB Chairman chuan Kelkang Revival Managing Committee hnenah an thawhna tura tangkai tur Computer set pakhat leh Printer a pe a, hei hian an hnathawhna a chhawk awlzam zawk a beisei thu a sawi a ni.

Champhai Deputy Commissioner Pu H. Lalengmawia chuan hmalak mek dan te leh kal zel dan tur a sawi a. Kelkang khawtlang hruaitute pawhin Sorkar hmalakna chungah a lawmthu sawiin, thawhhona tha an neihho zel a tul thu a sawi a ni.

Pu JH Rothuama hi NIB Secretary Pu James Lalrinchhana, NIB Secretary, Pu David Thangliana, NIB Chief Media Officer leh officer dang engemawzatin Aizawl leh Champhai atangin an tawiawm a ni.

Tun dinhmunah hian kar tin vawi hnih UD&PA Department-in bawlhhlawh paih motor Champhai atangin Kelkangah hian a tir thin a. Kelkang Biak In bula Community Sanitary Complex sak mek chu zawh tep tawh niin, hemi sak zawh a nih hian khaw dai a Dumping Ground tur sak hna tan leh a ni dawn a. Khawchhunga tui pump-na tur PHED chuan estimate siam in hma a la mek a. Electric thir ban 20 lo thleng tawh in,  tung turin hmalak mek a ni bawk.