MP tinte pual model village nei tura ruahman zingah Mizoram bil atan Chhiahtlang khua thlan anih thu hi Rajya Sabha MP Pu Ronald Sapa Tlau chuan vawiin khan Chhiahtlang Community Centre ah a puang a ni.

Hemi puala inkhawm ah MP chuan bul tanna chauh a ni tih sawiin, a nih tur ang ni turin khawchhung mitin an pawimawh dawn tih a sawi a. Mizoram hmun laili Chhiahtlang thlan a ni chu Mizoram kil tin ti eng tura entawn theih anih dawn avangin Chief Minister Pu Lal Thanhawla pawhin tha a ti a, a lawmpui hle tih a sawi . Model village chu mumal taka hawn a ni dawn tih sawiin, Chief Minister chu hawng tura sawm a tum thu leh model village siam tura ruahmanna ah Sawrkar fawng vuantu Deaprtment tinte leh mipuite rual taka thawh ho a tul dawn thu sawiin, hnam bil, party, kohhran, khawchhuak sawi lova khawtlang tanrual a tul tur thu a sawi bawk.

Mizorama hmasa ber tur model village ruahmanna ah hian mipui ei leh bar kawnga chawikanna tur te, tui mamawh tawk dawng vek tura ruahmmanna te, Organic farming leh huan thlai tui pek Drip System a kalpui te, Pawl 10 china a thlawnna zirna pek leh computer thiamna pek vek te, thalai thiamna leh talent haichhuah te, Smart school siam te , Hriselna kawnga Health insurance pek leh chaw inchawih tawk pe tura chhungtin tanpuina pek te, bawlhhlawh tihral dan mumal leh inthiarna mumal pek te, tar pension siamsak te, Village Tourism kalpui leh Kawlphetha leh mipui mamawh chi hrang hrang hamthatna kalpui a ni dawn a ni.

Model Village pual inkhawm hi Pu H V Hranglawta VCP Chhiahtlang in a kaihruai a. MP hi Serchhip atangin DRDA Project Director Pi Teresy Vanlalhruaii; DC aiawh in Pi Malsawmtluangi SDC leh Serchhip District-a Department hrang hrang aiawh ten an tawi awm a ni.