Vawiin khan NYK(Nehru Yuva Kendra) Mamit District bultumin District Youth Convention chu Mamit Chhimveng Hall ah hman a ni a, Mamit DC Pu K. Lalthawmmawia chuan khuallian niin a hmanpui.

Khuallian Pu K. Lalthawmmawia chuan thusawiin NYK chu khawvela thalai intelkhawmna Pawl lian ber a nih thu sawiin he pawla kan tel thei chu kan vannei hle a ni a ti a. Sawrkar laipuiin thalaite hmasawnna atan a hmachhawp ti hlawhtlingtu ni tur leh mi puitling ni tura intuaihriamna atan NYK chu hmang tangkai turin kalkhawm te chu a sawm a ni. Khuallian hian W. Phaileng Branch YMA chu Mamit District Best Outstanding Youth Club Award dawngtu tur an ni tih a puang a, Youth Club thlanchhuah 10 te hnenah Infiamna hmanrua a sem nghal bawk.

Mamit District Youth Co-ordinator Raj Kumar Joshi chuan inlawmna thu a sawi a, Mamit District NYK hnuaiah Youth Club 50 a awm tawh tih sawiin NYK chuan Thalaite tan programme hrang hrang a buatsaih thin a,Ramchhung hmun hrang hrang zin theihna programme te siam thin ani a,heng programme hrang hrangte hi Mamit thalai te hian ngaihven se tiin a sawm nghal bawk.

Mamit District Youth Convention ah hian HIV/AIDS chungchang mithiam ten Zirtirna Power point presentation hmangin neih ani a, Mamit MZP Hqrs. President Lalropuia chuan thu sawina hun a hmang bawk,he hun ah hian Thalaite leh Zirlai thahnem tak an kal khawm a, Zaithiam zai leh lam chi hrang hrang entir leh ngaihthlak a ni bawk.