Vawiin hian Serchhip DC Conference Hall ah Sansaad Adarsh Gram Yojana (SAGY) hnuaia Model Village atana thlan Chhiahtlang leh Khawlailung khaw tan General Insurance Corporation of India (Re-insured) Company in Corporate Social Responsibility (CSR) Fund an pek hmanga lei, Bawlhhlawh Paihna Motor (Sanitary Truck) chu Bawrhsap Dr. Lalrozama'n khaw pahnih VCP te hnenah a hlan a, DC Office tual atangin Motor te hi an khaw lam pan turin a  vai liam bawk.

Motor inhlanna inkhawmah Dr. Lalrozama, IAS chuan, Mizoram a MP Model Village pahnihte chu General Insurance Corporation (GIC- Re) chuan an Corporate Social Responsibility sum hmanga kum thum chhung atana an rawn enkawl thu sawiin a kum khatna chu a zawh fel tawh thu a sawi a. An CSR hmangtute zingah Chhiahtlang leh Khawlailunga kalpui dan chu India rama a tha ber pawl a nih thu leh an lungawi thu a sawi a. A rah chhuah hlu tak pawh dawng zelin GIC (Re) hnenah hian Serchhip khawpui tana CSR a lo dil ve pawh pawm sak niin Solar Street Lamp 95, Chhungkaw 20 tana Livelihood  Assistant leh Puan tahtute tan Puan banna inhman tawm tur pathum an rawn pek ve tur thu a sawi.

Bawrhsap chuan, Khawlailung leh Chhiahtlang khuate chu an vanneihna hlawk taka hmang thiam turin a chah a. Bungrua leh hmanruate chu inpe thin mah ila chhe leh mai thei an ni a, Model Village te kan pek duh ber zawk chu; faina hmangaihna tak tak rilru, ram leh khawtlang tana inpekna dik tak thinlung leh ram tana tha thawhtu nih chakna thinlung zawk a nih thu a sawi a. Model Village atana thlan an nih ang ngeiin khaw dangte tan Model an ni em tih inzawt fo turin khaw pahnih mipuite a chah a ni.

Pi Teresy Vanlalhruaii, Project Director, DRDA Serchhip, chuan SAGY village a hna an thawh dan leh GIC atanga CSR an hmuh dan leh chung sum leh pai an dawnte an hman dan report a pe a. Central sawrkar in Corporate te chu an CSR hmang tha tura a hriattirna kal zelah General Insurance Corporation of India (Re) te CSR chu Mizoram sawrkar chuan kan SAGY village pahnihah te hman a rem tih avanga dawngta an nih thu sawiin, tun thleng hian cheng nuaih 25 ve ve hmuh ni tawhin Smart Class Room siam nan te, Livelihood Assistant atan te, Women Empowerment atan te a hman a nih thu a sawi a. Tin Clean & Green Project kalpui bawk niin chumi peng pakhat Sanitation hnuaiah vawiinah Sanitary Truck an dawng ta a ni, a ti. Pi Teresy hian CSR petu Company te hian an CSR hmanchhuah dan tur duan sa an neih avangin mahni duh zawng zawnga lo kawih her theih a nih loh thu a sawi a, Mizoram SAGY Village pahniha chung CSR an hman danah a  petute an lungawiin India rama a ti tha ber pawl a nih thu a sawi a ni.

Vawiina an Motor inhlan hi Chhiahtlang khaw tan 407 Truck Mz-06/6140 leh Khawlailung tan Bolero Pick-up, Mz-06/6139 a ni a, Truck lian zawk pawh lei theih ni mah se khaw pahnih hotuten  an khaw chhung lane kawnga tlan thei tur ngaihtuah chunga an dil ang lirthei zawk pek an ni a, hun engemaw chen enkawl zuina tur sum fai an hlan nghal bawk.

Heng lirthei te hi sawrkar emaw Company emaw ten an enkawl pui zel tawh dawn lova, khawtlangin tha a tih ang leh a tul ang zelin a duh danin a hmang tawh dawn a ni.

He inkhawm hi Pi Rohnuni Kawlni, APO, DRDA in a kaihruai a, Serchhip SP Pu Lalringdika leh District Officers te, tlawmngaipawl aiawh leh Chanchinbumite an tel a, Khawlailung leh Chhiahtlang VCP ten thusawina hun an hmang ve ve bawk.