August ni 2-a Sihhmui Tlawng luia tui tla Pu Lalherliana (kum 35), Hunthar Veng ami zawn hna chu vawiiin thlengin kalpui zel a ni a; tui tla chhanchhuah hna thawktute inkulhna Sihhmui lei bulah I&PR Minister leh Aizawl North-III Bialtu ni bawk Pu Lal Thanzara leh DM&R Minister Pu C. Ngunlianchunga te chuan an tlawh a. Anni hian chhanchhuah hna thawktute nen inkawmin an tlawmngaihna chu chhuanawm an tih thu sawiin, tanpuina pawisafai engemaw zat an pek ve ve bakah DM&R Minister chuan silpauline pali a thawh bawk a ni.

Tui tla zawng hian YMA branch hrang hrang atangin mi tlawmngaite thawk in, vawiin hian Branch 11 atangin mi 200 chuang an thawkchhuak a.

I&PR Minister leh DM&R Minister hian Rangvamual leiminna hmun siamthat hna thawh mek chu an enfiah bawk a. DM&R Minister chuan lei laihna leh min zel tur dan nan a hnathawh nan hian cheng nuai 77 sanction nih tawh thu a sawi.