Vawiin khan Mizoram Legislative Assembly Speaker Pu R.Romawia chuan nikhat awh ‘Moral Reform Awareness Seminar’ chu I & PR Conference Hall-ah a hmanpui. Seminar hi Mizo Moral Reformation Network International (Moral Reform) huaihawt a ni a, he pawl ah hian Kohhran hrang hrang hruaitute an tel a ni.

Pu R.Romawia chuan ram in kan mamawh pawimawh ber chu rilru siamthat a nih thu sawiin ze tha Mizo in kan neih - rinawmna, taimakna, dikna leh tlawmngaihna te tih ral mek a awm leh hemi lamah hnungtawlh zawnga kan awm ta hi, in enchian a tul a ni a ti a. Pipu ten heng ze tha min rochhun leh Kristianna in a phuarbelh leh te hi tun din a tul tak meuh a, thangtharte ah heng ze tha hi tuh a pawimawh a ni a ti bawk. Ram hruaitute, Kohhran leh tlawmngai pawl ten kan tih tur kan ti lo em tih te hi in bihchian kan mamawh a tul thu Pu Romawia hian a sawi lang bawk a ni.

Speaker chuan Media in thangthar te rilru nasa takin a nghawng a, nun dik leh ze tha kan ngaihsanna kawngah thalai te media hi a kaihhruai theih tu ber a nih thu sawiin hemi kawnga media ten tun aia nasa zawkin tha thawh se a duh thu a sawi lang bawk ni. Rilru siamthat kawngah Moral Reform hnathawh chu ropui tiin Speaker chuan hemi lama inhrilhhriatna (awareness) neih tam a pawimawh thu a tarlang bawk.

Seminar, Vice Chairman Moral Reform Rev. T.C. Laltlawmlova kaihruai ah hian Lt. Col. Rohmingthanga, Vice Chairman ni ve tho chuan hunserh a hmang a. Chairman Moral Reform Rev. K LungMuana in ‘In rilru a thara awmin lo danglam zawk tawh rawh u’(Rom 12:2) tih leh AMC Chairman in ‘Aizawl Khawpuia Bawlhhlawh sawng bawl dan’ tih thupui hmang ten thusawina hun an nei a ni.

Seminar-ah hian tlawmngai pawl hrang hrang – MUP, MHIP, MZP, MSU leh MJA hruaitute bakah AMC Chairman leh a thawhpui dangte an tel a, zau taka sawihona hun neih a ni bawk. Moral Reform Treasurer Upa Chhawnvunga’n lawmthu sawina hun a hman zawh ah kharna hunserh chu Bishop Stephen Rotluanga CSC Adviser Moral Reform chuan nei zui nghal a ni.