Vawiin chawhnu dar 1:00 khan Lunglei District Industry Sector hnuaia NLUP dawngtu mi 88 te hnenah 2nd Assistant Installment Puanthuikhawl sem a niin he hun hi Pu S.Laldingliana Parliamentary Secretary chuan a hmanpui.

Puanthuikhawl dawng tu mi 88 zinga mi puanthuikhawl lo nei tawh sa mi 9 te hnenah erawh NLUP hi pawisa fai a sem a ni thung. He NLUP semna inkhawm hi Pu H.Thangmawia General Manager, DOC Lunglei chuan a kaihruai a, Pu Zathangliana, Nodal Officer NLUP. Lunglei District chuan Technical Report a pe bawk a ni.

Pu S.Laldingliana chuan Puanthuikhawl a sem hma hian thusawina hun a hmang a. Kan sawrkar chak takin mirethei leh harsa te eizawnna tur ngaihtuahin tunah hian kan flagship programme NLUP chu theihtawpin a kal pui mek a. Vawiin a NLUP dawngtute hian a thlawn a NLUP kan dawn rual hian mawhphurhna sang tak kan kovah nghah a ni tih hriain a ti hlawhtlingtu nih i tum theuh ang u a ti a.

Pu Dinga chuan NLUP dawngtu, hmang diklo an awm leh zauh thin chu pawi a tih thu sawiin hei hi thil pawi tak a ni a, kan tih loh tawp tur a ni, chuvangin rinawm taka theihtawp kan chhuah a ngai a ni a ti bawk.

Khawl dawngtute hi Tailor Super deluxe pakhat, Overlock machine pakhat, Jenome My Style pakhat, hand Tools bakah a phurh thlenna tur Rs. 22,300 theuh pek an ni.

Tunah hian Lunglei huam chhunga NLUP trade dang Carpentry, Weaving, Agarbati Stick Making machine te pawh khawl a lo thlen veleh a sem nghal mai theih tura ruahman a ni.