Vawiin chawhnu khan Central YMA hruaitute chuan Chief Minister Pu Lal Thanhawla chu a office chamber-ah hmuin nikuma YMA General Conference-a an resolution pass thenkhat te leh thu pawimawh dangte an sawipui a ni.

Chief Minister Pu Lal Thanhawla chuan Mizorama thil thleng hrang hrangte leh boruak inher danglam zelah YMA-in sorkar an thlawp that thin chungah lawmthu a sawi a. Zoram mipuite hamthatna tura YMA hmalakna hrang hrangte chu fakin sorkarin a theih ang chin chinah YMA chu tanpui leh thlawp let a tum ve zel tur thu a hrilh a ni.

Vawiin Chief Minister an hmuhnaah CYMA hruaitute chuan Tuikhuahtlang-a YMA Hall sak tur chungchangah chak zawka hma lakpui turin an ngen a. Nikum YMA Conference-a resolution an pass tawh angin Zoram hmun tam takah zirtirtu indaihlohna nasa lutuk a ngaihmawhawm thu leh a rualkhai zawka zirtirtute dah nise an duh thu Chief Minsiter hnenah an thlen bawk a ni. Chhingchhip-a Sainik School hmun chu tlawhho an rawt a; tunlai eirawngbawlna Gas harsatna chungchang pawh an sawiho a ni.

Vawiin meeting-a lo tel ve Kolasib Branch YMA hruaitute chuan Chief Minister hnenah an mamawh hrang hrang an thlen ve a. Kolasib-ah MPSC Exam Centre awm ve thei se an duh thu leh Economic & Statistics Department Office pawh hawn theih nise an duh thu an hrilh. Kolasib District huam chhungah Government Higher Secondary School a la awm miah loh avangin hemi chungchangah hma lakpui turin an ngen bawk a ni.