Mizorama motor chetsualna thleng tam lutuk ven nan leh motor khalhtute uluk zawka zirtir an nih theih nan vawiin chawhnu dar 2:00 khan Transport Minister Pu John Rotluangliana hovin ama office chamber ah Driving School neitu te leh D.T.O. te meeting neih a ni a. Motor chetsualna ah mihring nunna hlu tak chan a nih bakah ramtuileilo-a insiamna te a thlen thin avangin motor khalhtu ten fimkhur taka motor an khalh thin a pawimawh thu sawiin Minister chuan driving school neitu te chu uluk zawka an zirlai te kaihruaia, an hnuaia zirlai te mizia leh nungchang te zirchiang a, driving licence pek tlak loh mi te chu hnawl ngam thin turin a chah. Mizorama motor chetsualna thleng thin ah motor khalhtu thiamloh vang a nih tlangpui thin avangin uar lehzuala motor khalhtu te fimkhur tura infuiha inzirtir a tul thu te a tarlang bawk.
Parliamentary Secretary Pu T.T.Zothansanga, Transport Secretary Pu Hrangtawna leh Transport department hotu te nena meeting ah hian motor chetsualna tihtlem a nih theih nana thawh ho dan tur te an sawiho a, heng point te hi tarlan a ni :-
1. Driving School ten uluk zawkin motor khalh zirtir thin se.
2. Motor khalh zir tur te mizia leh nungchang te uluk taka lo zirchian thin ni se.
3. Thinchhia / thinram, leh ruihtheih thil ti thin te chu motor khalh zirtir loh a, licence pawh pek loh ni se.
4. Motor khalh laia awmdan mawi leh hawihhawm dan te inzirtir ngun ni se.
5. Traffic Rules chi hrang hrang te uluk takin zirtir thin ni se.
6. Kawngpuia tlan laiin ngaihpawimawh tur - damlo phur Ambulance, Emergency Light chhi motor / Fire Service (kang thelh) motor / VIP motor etc te kawng ken nachang inzirtir ni se.
7. Two wheeler khalhtu zingah manner hre lo leh hawihhawm lo, chep tak kara inzeh ching an tam thin chuan chetsualna a thlen fo thin a, uar zawka hawihhawm tura inzirtir ni se.
8. Zanah midang enkhalh zawnga light chhi lovin dim (tihhniam) nachang hriat thin ni se.
9. Private Driving Licence nei, public carrier (taxi etc.) khalh thin tam tak awm te chu dapchhuaha Dan anga hmalak ni se.
