Vawiin chawhnu khan Dihmunzawl a Pi Kaphliri, Bungkawn-in Buh thar tam thei chi, CAU RI leh Hybrid DRRH-2 Terrace-a a chin te chu Home Minister leh Agriculture Department enkawltu Minister ni bawk Pu R. Lalzirliana hova seng a ni a. Home Minister hi Environment & Forest Minister Pu Lalrinmawia Ralte ; Secretary, Agriculture Department Pu Lalhmingthanga, IAS leh Agriculture Director (Crop Husbandary) Dr.C. Lalzarliana ten an tawiawm a ni.

Agriculture Minister Pu R.Lalzirliana chuan ei leh bara kan intodelh loh chuan kan hnam a zahawm dawn lova tiin loneitu leh kuthnathawktute chu Sawrkar in a ngaipawimawh a, an phur nan te, zangkhai zawka hna an thawh theih nan te leh hlawk zawka buh leh bal leh thlai te an tharchhuah theih nan khawl chi hrang hrang te pein, nasa takin Sawrkarin hma a lak thu a sawi a. Tunhnai a leilet neite tan tractor 20 pek an nih thu sawiin heng ruahmanna te hi kal chhunzawm zel tur a nih thu a sawi bawk. Heng Buh chi tha leh thar hlawk te hi System of Rice Intensification (SRI) method hmanga chin an ni a, Agriculture Department-a mi thiamte kaihhruaina leh enkawlpuina hnuaia ching an nih avangin Buh hi rannung leh a tichhetu dang lakah an himin thar hlawk hle tura beisei a ni. Heng Buh chi tha te hi ni 115-125 chhungin a seng theih a ni.

Pu Lalrinmawia Ralte E & F Minister chuan Pi Kaphliri te chhung taimakna leh thawhrimna fakin Agriculture Department-in ti tura an tih te thuawih taka an tih thin naah te, loneitu dang tana hmahruaitu an nih theih zelna leh an thawhrimna leh hlawhtlinna avanga Central Sorkar pawhin mi hlawhtlingte a lawmpui zinga an lo tel tawhnaah te a lawmpui thu a sawi.

Pi Kaphliri hian kum hmasa lamah pawh Agriculture Department-a thawktute thurawn angin Dihmunzawla an loah hian Buh leh thlai hrang hrang an lo ching tawh thin a, an ram hi Buh seng zawhah pawh dah awl mai lovin thlasik thlai chi hrang hrang bakah Sweet Corn chin nan te hmangin sum hmuhna tha tak atan pawh an lo hmang tawh thin a ni. An hnathawhna kawng hrang hrangah Agriculture Department-a thawkten uluk tak leh taima taka an thawhpui thinnaah lawmthu an sawi bawk.

Vawiina Buh sengna hunah hian Agriculture Directorate leh Aizawl District Office atangin Officer leh Staff engemaw zat an tel a ni.