Vawiin khan Pu Dominic Lalthankhuma, Kawrtethawveng khua chuan February 2014-a savawm note mit pawh la keu lo miin an man lei saka duat taka a lo chawm len chu Environment & Forest Minister Pu Lalrinmawia Ralte kaltlangin Aizawl Zoological Park-ah dah turin a pe (donate) a. Hetianga ramsa thi mai tur duat taka lo chawm liana lo enkawltu Pu Dominic Lalthankhuma chungah hian Environment & Forests Department chu a lawm hle a ni.

Nungchate humhalh kawnga Environment & Forest Minister Pu Lalrinmawia Ralte thahnemngaihna avangin a bial chhung atangin February 2014 khan Pu Lalhlimpuia, Zawlnuam chuan Mizorama ramsa vang tak Chinghnia note pahnih (2) a mit pawh la keu lo atanga a lo enkawl chu E&F Minister kaltlangin sahuanah hian a dah tawh a, tuna Pu Dominic Lalthankhuma, Kawrtethawveng in savawm a dah hi E& F Minister Pu Lalrinmawia Ralte bial atanga Aizawl Zoological Park-a ramsa pek (donate) vawi hnihna a ni.Ramsate hi mimalin mahni duhthua khawi phal a ni lova. Hetianga ramsa lo khawi emaw lo kawl emawte chuan Environment & Forests Department hnenah hriattir zel turin ngen an ni.

Aizawl Zoological Park hi ramsa chi hrang hrang dahna leh enkawlna hmun a ni a, a tlawhtute pawhin sahuan chhung hi ti bawlhhlawh lo tura fimkhur theuh turin an ngen a, sahuana ramsate hi a tlawhtu ten chhaih leh tihnat emaw chaw leh ei tur engmah pek phal a ni lo.

Vawiin Savawm an pek tak hi E&F Department staff Pu K.Malsawma, Asst. Conservator of Forests (WL), Pu Dr. C.Lalzuitluanga, Veterinary Officer, AZP leh Pu K.C.Lawmzuala, Range Officer, AZP ten Aizawl sahuan ah hian dahthla in, Sahuan a sa an dahna hmun hma fello lai leh himlo laite a hmunah kalin an enfiah nghal a ni.