Vawiin khan Urban Development & Poverty Alleviation (UD&PA) Minister Pu Zodintluanga hovin Aijal Club-ah motor hmang lova veivahna hmanrua, kê-a kal leh cycle-a khawpui chhunga kalna remchang siam Non-motorized Mobility for Aizawl chungchang sawihona workshop neih a ni.
Pu Zodintluanga chuan Aizawl khawpui thang chak takah mipui leh motor veivahna a chep telh telh a, tlang ram a nih avangin kawng zauh belh a harsa bawk si a, chuvangin he harsatna su kiang tur hian sawrkar leh mipui thawhhona tha a pawimawh a ni, a ti. Aizawl District Transport Office record in a tarlan danin chawhrualin nitin Aizawlah motor thar 50 zelin a pung a, kal dan ngai renga kal chuan nakin lawkah chet hleih theihloh khawpin Aizawl khawpui hi a la tawt dawn tih a lang reng a ni, a ti a. Sorkarin khawpui nuam zawk kan neih theih nan ruahmanna thar a chhawp chhuak chho zel a, chung ruahmanna te chu zawm lova kan do zel chuan Aizawl khawpui hi nakin lawkah chuan chenna tlak loh khawpuiah a chhuak mai dawn a ni tih hriain mipuite tawiawm turin Minister chuan a sawm a ni. Pu Zodintluanga chuan Urban transport chungchang sawifiahin khawpui chhunga veivahna leh a kaihhnawih foot-over bridge, flyover bridge, junction hrang hrang inhmuhkhawm dan te, eng ang motor nge tlan tur tih te, mihring kalna tur te, cycle kalna tur te, rope-way, monorail, cable car zawng zawng te a huam a. Hengte hi inhmurem taka a kal theih nana ruahmanna siam hi urban transport thil tum chu a ni, a ti a. UD&PA Minister chuan urban transport mumal tak ruahman a nih dawn chuan a kaihhnawih sorkar, department hrang hrang leh mipuite pawhin rilru hmunkhat pu-a thawhho kan thiam a pawimawh tak zet a ni, a ti bawk.
Aizawl Municipal Corporation (AMC) Mayor thar Pu PC Lalhmingthanga chuan kalkhawmte lawmna thu sawiin Aizawl khawpui hmasawnna tur ruahhmanna hrang hrang chhawpchhuah zel a ni chu lawmawm a ti a. Mithiamten an lo duan tawh Aizawl Master Plan nena inhne rem takin heng hmalakna tharte hi kal zel se a duh thu leh sum tam tak sen tawh hnua chhutchhiat leh tul thin hian mipui sum a khawhral nasa tih hriaa ruahmanna thar siamtute pawhin Master Plan awmsa hrereng chunga siam thin turin a chah a ni.
Keynote address pe tu UD&PA Secretary Pu C.Vanlalramsanga pawhin Aizawl khawpuiah Non-Motorized Transport (NMT) tha neih a tulzia sawiin ke a kalna mumal a awm lo chung pawhin Aizawlah 50% vel zet chuan NMT kan hmang tho tih iTrans report in a tarlang a ni tiin hei hian NMT mumal kan neih a tulzia a tilang chiang hle a ni, a ti. Secretary chuan Motor hmang lova ke leh cycle a veivah hi a hrisel a, boruak a ti bawlhlawh lova, a man a tlawmin a rintlak bawk a, motor veivah tamzia ngaihtuahin ruahmanna tha erawh siam a tul hle a ni, a ti a. Workshop a tel zawng zawngte chu ngaihtuahna uluk tak senga, Aizawlah NMT mumal taka kan neih theih nan rawtna tha chhawpchhuak turin a sawm a ni.
Workshop hawnna inkhawm hi iTrans MD leh CEO ni bawk Dr. Anvita Arora chuan a kaihruai a. Project Management Consultant (PMC) Team Leader Sudesh Kumar chuan Sustainable Urban Transport Project (SUTP) project chungchang a sawifiah bawk. Workshop hi nilenga neih niin State sawrkar leh phai lam mithiamten inrawnkhawmna hun an hmang a ni. Workshop-ah hian AMC Deputy Mayor, Councillor dangte bakah a kaihhnawih sawrkar department hrang hrang aiawh an tel a ni.
December 2013 khan New Delhi a workshop neih tumin Aizawl khawpui aiawhten NMT plan siam an duh thu an tarlang a. Aizawl leh Vishakapatnam khawpui pahnihte chu Ministry of Urban Development (MoUD) chuan thlang chhuakin draft plan siam a ni a. MoUD vek hian IBI Group leh Innovative Transport Solutions (iTrans) chu Guidance Documents on Transit Oriented Development (TOD), Non-Motorized Transport (NMT) leh Bike Sharing (BS) scheme siam turin a thlang a ni.
