Vawiin khan UD & PA Minister Pu Zodintluanga, Mizoram State Sports Council President nibawk chuan a office-ah Central YMA hruaitute leh Mizoram State Sports Council hruaitute a kawm a. MSSC hi Secretary Pu C. Laltlanthanga, Vice President Pu John Kima leh Jt. Secretary Pu Lalrinfela te an ni a. CYMA atangin President Pu Lalbiakzuala; Vice President Pu Vanlalruata; Secretary Pu Lalhmachhuana; Asst. Secretary Pu R. Lalngheta; Treasurer Pu J. Lalsailova leh Fin. Secretary Pu Lalrochhuanga Pachuau te an ni.

Mizoram hmasawnna tur leh thatna tur atana an ni ho nena an thawhhona leh hma an lo lakna ho tawh thinna chuan hmasawnna leh rah tha tak neia a hlawhtlinna te pawh hmuh theiha a awm thu sawiin Pu Zodintluanga chuan hun lokal zel turah pawh tha taka an thawhho zel a beisei tlat thu a sawi a. Mizoram chhunga tuihna humhalh chungchangah pawh YMA te leh PHE Department te nena hma an lakna chuan tunah hian lang theiin hlawhtlinna a hmuh tawh thu leh Mizorama Kohhran lian tak takte pawhin ramngaw humhalh leh tuihna humhalh chungchangah phei chuan rawn zawmin tuihna humhalh leh ramngaw chereu tur venhim chu an rawn chawinung zel a ni tiin lawmawm a tih thu a sawi.

Infiamna lamah pawh Mizo thalaiten hlawhtlinna tha tak tak hmuin hming chher tak tak tawh te pawh an awm a ni, tiin Sports Minister chuan khawtin leh district hrang hranga YMA hruaituten infiamna hrang hrang leh football ah te tan an lakna ah rah tha tak chhuahin thalai talent nei tha tak takte phochhuahin an lo awm ta a ni, a ti a. Khelmual te pawh kan nei tha tawh a, state pawn lam infiammite tan pawh a zahpuiawm tawh bik lova, heng kan khelmualte hi chei chho zelin uluk takin enkawl ila thangthar infiammite tan malsawmna lo ni thei zel se tih a duh thu a sawi.

Mizo thalaite eizawnna hna thawk tura state pawn lama inzarpharh a tul takzet tawh a ni tiin Minister chuan state pawn lama khawi i lo kalna ah te office hrang hrang an dawr thinna ah kan chhehvel hnamdangte an inzarpharh nasa in hotu leh hna pawimawh tak tak chelhtu an lo ni thin chu rualawh thlak a tih thu leh kan Mizo thalaite pawhin an hna chelh ang hi an theiin an thiam ve vek tho a, chuvang chuan heng lamte pawh hi ngaihtuah ve a hun tawh a ni a ti a. IAS leh Central Service hrang hrangte bakah NEC leh Office pawimawh dang dangah te Mizo te ngei kan thawh ve a hun tawhin tihtakzeta helamah hian kan hawizau angaih thu a sawi bawk.

Heng bakah hian Mizoram hmasawnna tur leh thu pawimawh tak tak te sawiin inkawm hona tha tak an nei a ni.