Vawiin chawhnu dar 1 khan Traffic Management Committee chu an Chairman Pu P.C. Zoram Sangliana, Transport Minister hovin ama offic ah thukhawmin, krismas leh kumthar vuakvetah motor tlan lohna area (No Vehicle Zone) siam leh an rel.

Pu Zoram Sangliana chuan kum danga No Vehicle Zone kan siam thin ah thenkhatah sawiselna tawk thin mah ila, mipui nawlpui tan lawmawm lam ni a hriat anih avangin kumin pawh hian December 22, 23leh 31 hian siam leh tha a hriat anih thu a sawi.

Committee chuan heng ni 3 chhung zinglam dar 11 atanga tlai dar 4 thleng No Vehicle Zone siam chu tha an ti tlang a, Zodin Square atanga Chanmary kawn area ah chuan hemi darkar chhung hian motor tlan phal a ni dawn lova, motor dah (parking) pawh phal a ni lo bawk ang.

Mipui motor bazar nan emaw a hmang duh chuan No Vehicle Zone pawn lamah motor an dah tur a ni a, motor neituten Parking ah harsatna an tawh loh nan Mizo Govt. High School Field chu thuneitute hnenah parking atan dil nise, field hi felfai taka vawn ni turin Zarkawt Local Council te kutah dah nise tih committee chuan a rel a. Parking fee khawnin enkawl fai hna ah hman nise an ti.

No Vehicle Zone siam ni ah hian Ambulance leh Emergency duty ngai chi hote chu Traffic Police te nen inremsiamin an tlan phal sak anih tur thu committee chuan a rel bawk.

Hemi ni a Bara Bazar bawlhhlawhte thenfai na atan Dawrpui Local Council ten ruahmanna siam se tih pawh an rel tel bawk a ni.