4329/2023-2024

Aizawl, 22.03.2024: Vawiin tlai dar 6 pm khan tun Lok Sabha inthlanpui a Mizoram tana Expenditure Observer Pu Arvind Sharma chuan Mizoram chhunga Bank hrang hrang aiawhte DC Conference Hall ah kawmin, inthlan hunchhunga an Bank theuh a sum che vel vil uluk turin a chah.

Inthlan chhung hian candidate te leh mipui bank account a sum chevel rinhlelhawm "suspicious activity" awm thei ang chi chu report vek thin turin Bank zawng zawng a beisei a. Hei hian (i) bank account cheng nuai khat aia tam lakchhuah emaw dah luh (a hma thla hnih chhung a chutiang transaction la awm ngailo) te, (ii) RTGS kaltlanga bank account pakhat atanga district /constituency khata mi tam tak account a sum thawnchhuah (a hmaa chutiang ang sum inthawnchhuah la awm ngai silo) te, (iii) candidate emaw, a affidavit a a tarlan a kawppui emaw amah a innghat/ chenpui (dependent) te account a cheng nuai khat aia tam thunluh leh lakchhuah te, (iv) election hunchhunga political party account a sum lut leh chhuak cheng nuai 1 aia tam leh, (v) voter te thamna ni thei awm anga lang cash transaction rinhlehawm dang reng reng a huam a ni.

Expenditure Observer Pu Arvind Sharma chuan inthlanpui thianghlim leh felfai nei tura Bank thawktute an pawimawh thu sawiin, Election Commission of India (ECI) in a beisei anga he "suspicious activity" chungchang hi nitin report pe thin turin a hrilh a. Nikum MLA inthlanpui a state pakhat a cVIGIL app hmanga sum thahnem tak manchhuah a nih dan te sawiin, cVIGIL app chu a tul anga hmang tangkai turin a chah hlawm bawk.

He meeting ah hian Election Expenditure Monitoring Asst. Nodal Officer Pu F. Lalhruaizela pawh a tel a ni.