MP (RS) Pu Ronald Sapa Tlau kaihhruaina in vawiin khan Champhai DC Conference Hall-ah District level Vigilance & Monitoring Committee thut khawm a niin, kumin sorkar kum thla thum chhunga Champhai District bikin sorkar laipui sum hmanga Rural Development Programme hrang hrang a hmalak dan thlirletna neih a ni a, he hun hi Champhai North bialtu MLA Pu TT Zothansanga'n a hmanpui.
Meeting kaihruaitu MP Pu Ronald Sapa Tlau chuan thingtlang a cheng mipuite hmasawnna tura sorkar laipui sum hman danah a khawihtu Department (Nodal)ten rinawm tak leh thahnem ngai taka an thawh atul thu tarlangin, hmasawnna tura sum dawn tam leh hnathawh tam aimahin hmalak china hnathawh that a pawimawh thu leh chu chu a ngaihpawimawh ber anih thu a sawi bakah phailam atanga khawi tur leh chin chhawn tur a chi lak thin chu a tlangpuiin a that tawk loh thu leh fimkhur atul thu tarlangin, heng zinga Sangha chi kan chawkluh thinah eng sangha chi nge anih hriat hleih theih loh chhumchhia leh te lutuk lakluh thin chu tihtawp a hun tawh thu a sawi a. Hetiang District Level meeting pawimawh takah hian Champhai District chhunga MLA tinte tel thin se a duh thu leh harsatna hrang hrang vanga MLA 4 te tun tuma an tel thei lo chu a hriatthiampui thu Pu Ronald Sapa chuan sawiin, chawlhkar hnih hmalamah meeting neih tur hriattirna siam anih tur thu he meetingah hian tarlan a ni bawk.
District Level Meeting hmasa zawka thu dah awmte he hunah hian thlirlet hmasak niin, Rural Development Programme hrang hrang: MGNREGA, IAY, IWMP, MPGSY, NRDWP, NBA, NSAP, RGGVY leh DEO kaltlanga hmalakna te Champhai DRDA Project Director Pu CC Lalchuangkima'n a tlangpui tarlangin, sorkar kum thar (2015-16) atan sorkar laipui atanga sum an la hmuh mumal loh vanga hmathar lakna a tlem thu a sawi bakah MGNREGA bikah pawh Champhai District chhunga MGNREGA Job Card nei mi 28242 tan Ni 2 chiah inhlawhna pek anih thu a sawi. Sorkar (Nodal) Department hrang hrangten an hnathawh tarlan dan an sawi hnuah hna peng hrang hranga hmasawnna hnathawh thlirletna leh sawihona hun neih niin, hmalaknate a tlangpuiin tha thawkhat a ngaih a ni.
