Pu H.Rohluna, School Education Minister hoin vawiin chawhma dar 10:00 khan New Education Policy sawrkar laipuiin a duan tur chungchangah “Consultation Meeting on New Education Policy” chu Art & Culture Auditorium, Berawtlang-ah neih a ni. He hun hi New Education Policy duan thar tur atana mipuite rawn a, an ngaihdan hrang hrang te lakhawma hmalak dan tur inhrilh hriatna hun atan School Education Department-a thawktute tana buatsaih a ni.

Pu H.Rohluna chuan kumin chhunga Department hna lakna hrang hrang-ah thawhhona tha tak department hotute nen an nei thei chu lawmawm a tih thu a sawi a, thawhhona tha neih zel a beisei thu leh thawktute chuan an mawhphurhna theuh an hlenchhuah dan inenfiah fo turin a chah. Elementary Level a zirlaibu thlak a, zirlaibu indaih lohna a awm chu pawi a tih thu leh Middle Section a textbook hman tur ruahman mek chu kumina indaih lohna te leh felhlel awm te hre rengin dik leh felfai zawka kalpui mek a nih thu a sawi.

Zirtirtu indaih lohna awm thin chungchang sawiin Minister chuan VRS hnuaiah zirtirtu 60 la leh tura ruahman mek a nih thu leh MPSC kut-a dah anih tawh thu a sawi a, hei hian zirtirtu indaih lohna awm thin te engemaw zat a phuhruk theih ngei a beisei thu a sawi bawk.

School sawikhawm ‘amalgamation’ hmanga fimkhur taka ruahmanna siam niin hemi atan pawh hian heng zirtirtu indaih lohna awm thin harsatna awm chu a sutkian theih a beisei thu a sawi a, Minister chuan kalkhawmte chu khawvel lo thang chho mek, changkanna mila zirna tha kalpui turin leh he hun pawimawh tak hi hmang thiam turin a fuih bawk.

Pi Manisha Saxena, IAS, Commissioner & Secretary, School Education Department pawhin thu sawiin ‘New Education Policy’ Ministry of Human Resource Development, Govt. of India in a buatsaih hi khawvel lo thang chho zelah hian zirna atana tangkai tak tur anih thu sawiin he hun hmang a lokal te chu an thil hriat te hmang tangkai turin a chah bawk.

He hun hawnna inkhawm hi Pu K.Lalthawmmawia, Director of School Education Department, Mizoram in a kaihruai a ni. Kum 1986 khan National Policy on Education chu duan a ni a, chu chu kum 1992 khan siam danglam leh a ni. Hemi atang hian zirna kalphung ennawnna atan vawi engemaw zat tihdanglam a ni a. Sawrkar laipui chuan National Education Policy hi zirna tha, zirna tih danglam leh zir zau zelna atan te, mipui mamawh danglam zel phuhru tur zawng a phurh chhuah hi a duh dan a ni a, zirlaite an mamawh, thiamna leh hriatna pek leh Science, Technology, Academics leh Industry a mihring indaih lohna tibova India ram hi hriatna chungchuang neihtir a tum a ni.

He Meeting-ah hian School Education Department hnuaia Officers te an tel kim hle.