Vawiin khan MP Pu Ronald Sapa Tlau chuan thuthar thehdarh tute Regency Hotel, Aizawl-ah kawmin; Food Corporation of India Kudam-a buhfai dinhmun a sawi pui.

Pu Ronald Sapa Tlau chuan thuthar thehdarh tute chungah thahnemngai taka a tul ang anga chanchin an chhuahsak thin chu lawmthu a sawi a. Tun dinhmunah hian Aizawl-ah 3512 metric tons, Lunglei-ah 1384 metric tons, Lawngtlai-ah 1052 metric tons, Kolasib-ah 907 metric tons, Bairabi-ah 4189 metric tons leh Bualpui-ah 1001 metric tons awmin, a vaiin 12,045 metric tons buhfai a awm, a ti a. Sairang-a Civil Supply Department  ram-ah Kum 99 chhung atan Food Corporation of India chuan ram thar a nei dawn a ni, a ti a. He hmunah hian reilo te-ah Kudam sak te pawh tan tum a ni, a ti. Buhfai that leh that loh tehna pawh uluk taka kalpui a ni, Quality Control Team te pawh an inthawn thin a ni. Tun dinhmunah hian fur pui lo thleng tur atan (monsoon stock) buhfai pawh dah a ni,tiin a sawi a. Buhfai tamber hi Haryana leh Punjab atanga lak a ni deuh ber a, a chang chuan Uttar Pradesh atanga lak a ni, a ti.