No.2226/2021-2022

Aizawl, 15th September, 2021: Vawiin khan MP(LS) Pu C. Lalrosanga chuan New Delhi-ah Union Home Secretary (Border Management) Pu Sanjeeva Kumar leh Additional Home Secretary (North East) Pu Piyush Goyal te hmuin tunhnaia Myanmar atanga Mizorama raltlante chungchang a sawipui.

Kumin kumtir atanga Myanmar ram buai avanga rawn tlanlutte enkawlna leh chhawmdawlna ngaihtuahpui tur leh sum leh pai bakah damdawi leh mamawh dangte tiamin tanpuina awm thei ang ang ngaihtuah sak turin Home Ministry hotute chu a ngen a. Pu C. Lalrosanga chuan Mizoram leh Assam ramri buai chungchang pawh Home Ministry hotute chu sawipuiin a chinfelna atan chak taka hma la tur leh theihtawp chhuahpui turin a ngen a ni. Ramri hrul hmunte tihmasawn tura hmalak chak a tul thu Pu C.Lalrosanga chuan Border Management Secretary leh Addl Secretary chu sawipuiin, sum tam zawk leh ngaihtuahna tam zawk seng turin a ngen a ni. Mizorama State Police Service Officer-te All India Service-a an kaisanna tur tihkhawtlai nia a hriat thusawiin Lok Sabha MP chuan lo enfel rang turin Union Secretary-te chu a nawr nghal bawk.