No.2225/2021-2022
Aizawl, 15th September, 2021: Health & Family Welfare Department, Government of Mizoram chuan High Court thupek bawhzuia Lungleia RT-PCR Laboratory din tura hma an lak dan a hnuaia tarlan ang hian thuchhuah an siam.
Guwahati High Court, Aizawl Bench in Lungleia RT-PCR Laboratory din a nih theihna tura Public Interest Litigation (PIL) mithahnemngaiten an thehluh chu uluk taka a ngaihtuah hnuin August ni 4, 2021 khan thutlukna (Judgment Order) a tichhuak a, he judgement order ah hian Sawrkarin Lungleia RT-PCR Laboratory tur a ruahman mek sak zawh a nih hmaa lo hman lailawk turin RT-PCR Laboratory din a remchan dan ngaihtuah turin thu a pe a ni.
Mizoram sawrkara Health & Family Welfare Department chuan High Court thutlukna hi rang taka bawhzui nghalin August ni 9, 2021 khan Principal Director, H&FW Chairmanna hnuaiah RT-PCR Laboratory chungchanga hmala tur Committee a din nghal a, he Committee hi a tuk August ni 10, 2021 khan tilianin member ruat belh an ni.
High Court in Lunglei Tourist Lodge emaw, hmun dang remchang laboratory dinna tur atan hian en tura a tih angin August ni 13, 2021 khan he Committee din thar hian Lunglei an tlawh nghal a, Lunglei Tourist Lodge pawh a hmunah enfiah nghal a ni. Committee Member zinga mi Medical Superintendent, Civil Hospital, Lunglei chuan, Lungleia mimal leh sawrkar building ruak remchang dang ni a an hriatte a lo dawr tawh thu sawiin report a pe a, amaherawhchu heng building ruak an ente hi a neitute lam atanga remtihna an hmuh theih loh avangin Lunglei Tourist Lodge ah hian RT-PCR laboratory din tura hmalak mai Committee hian tha an ti a, sawrkarah inspection report chipchiar tak ziakin an thehlut a ni.
Committee in report an thehluh hi bawhzui niin September ni 7, 2021 khan Tourism department ah Lunglei Tourist Lodge hman phal dilna ziakin thlen a ni a, tawngka chuan phalna hmuh tawh niin, ziaka chhanna ngaihchan mek a ni. RT-PCR Laboratory hi Hospital premises pawna din tur a nih vangin Indian Council of Medical Research (ICMR) ah September ni 7, 2021 vek khan RT-PCR laboratory din an remtihna dil a ni a, September ni 10, 2021 khan lehkha hi thawn nawn leh niin chhanna ngaihchan mek a ni.
Lunglei Tourist Lodge-a RT-PCR laboratory dinna tur hian estimate pawh siam tawh niin, room layout leh hmanrua leh bungrua (equipments) mamawhte pawh ruahmanna siam fel vek tawh a ni a. Lunglei Tourist Lodge panna kawng hi a ngheh loh avangin lirthei tlan tir a him lova, ICMR atanga phalna hmuh a nih veleh siam tha tura dilna Mizoram sawrkarah thlen a ni bawk ang.
