3146/2022-2023

24.12.2022 : Constitution Club, New Delhi-ah December ni 22, 2022 (Ningani) khan Lok Sabha leh Rajya Sabha Member-te tan Christmas lawmna 'Parliamentarians' National Christmas Celebration' hman a ni a, ramchhung State hrang hrang aṭanga sakhaw hrang hrang bia MP-te an tel a ni. 

Mizoram Lok Sabha member Pu C. Lalrosanga chuan he hun hi kaihruaiin Bible aṭangin Lal Isua pianna chanchin hrilhlawk a nih dante leh 'Remna Lal' a nih dante a sawi a. Khawvelin a mamawh em em remna leh muanna dik tak chu Isua  hian a rawn keng a ni a ti. 

He Christmas programme-ah hian Meghalaya aṭanga MP (Lok Sabha) Pi Agatha Sangma leh Nagaland aṭanga Rajya Sabha MP Pi Phangnon  Konyak ten Bible-a Lal Isua lo piandan chanchinte an chhiarchhuak a. Manipur aṭanga Lok Sabha Member Dr. Lorho Pfoze chuan ram hruaitute leh mipute tana ṭawngṭaina a hmang bawk. 

Christian MP-ten an buatsaih hemi programme Organising Chairman Pu Francisco Sardinha, Goa Lok Sabha MP-in duhsakna thu a sawi bakah Madhya Pradesh, Tamil Nadu, Jammu & Kashmir, Kerala  leh state dang aṭanga MP-te leh sakhaw rawngbawltuten thu an sawi bawk. Delhi-a kohhran hrang hrang zaipawlten hla an rem bawk a ni.



Attachment

  • Loading attachment...