3145/2022-2023 

Lunglei the 24th December, 2022 – December ni 12, 2022-a Lunglei DC Conference Hall-a meeting neiha lo rel tawh angin vawiin khan Lunglei DC charge la mektu Additional DC Pu Donny Lalruatsanga hovin YMA town branch thenkhat te tlawh an ni.

He hunah hian official thenkhat leh Sub Hqrs YMA Lunglei President Pu Lalrotluanga hovin Sub Hqrs YMA Office Bearers-te telin YMA Branch Duty post-te an tlawh kual a, cheng sang khat (Rs.1000/-) theuh an hlan a ni. Lunglei khawpui chhunga YMA Branch te hian ngawrh takin duty kalpuiin December ni 21/22 atangin duty an tan hlawm a, Police, Excise, VDP te nen thawhhona tha tak neiin zanin atangin veng chhung fan chhuah patrolling duty kalpui an tum thu an report a. Tun dinhmunah thil thleng duhawm lo leh buaina lian tham chhuak report ala awmlo a ni.

Christmas leh Kumthar vuakveta dan leh thupek kenkawh leh venhimna tha taka kalpui anih theihnan a kaihhnawih Sawrkar Department-ten detailment mumal tak siamin duty an kalpui mek zel a. Lunglei Police ten tun dinhmunah patrolling ngawrh taka kalpuiin ni khatah vawi 4 – chhunah vawi 2 leh zan lamah vawi 2 patrolling an kalpui a. Hunpui chhungin mipuiten awlsam zawka police an pan theihnan leh venhimna chak zawka kalpui anih theihnan Lunglei khawpui chhung hmun lun lai pathum – Chanmari, Police Station kawt Venglai leh Sobji Bazar ah te a duh apiang pan theih turin Police Help Desk an chhawpchhuak bawk a ni. Excise & Narcotics Department chuan MLP Act 2019 leh ND&PS Act, 1985 te tha taka kenkawh anih theihnan December ni 15 atanga January ni 5, 2023 thleng Lunglei District chhunga duty tur ruat fel an ni a. District chu group panga ah then niin mi 26 duty tura ruat an ni.  

Deputy Commissioner Lunglei chuan December ni 15 khan Order ti chhuakin Christmas leh kum thar vuakveta Executive Magistrate duty detailment a ti chhuak a. Pi Malsawmhriatzuali, SDC Lunglei leh Pu John Lalramhluna Hnamte, SDC Lunglei te chu Lunglei khawpui chhunga Executive Magistrate duty tura ruat an ni. 

Attachment

  • Loading attachment...