2071/2022-2023
Aizawl the 26th September 2022 : Pu C.Lalrosanga, MP (LS) chuan kar hmasa September ni 22, 2022 (Ningani) khan Hnahthial District Disha meeting a neihpui a, he meeting-ah hian Central Sponsorship Scheme hmanga department hrang hrangte hna thawh thlirho anih bakah, Aizawl to Tuipang kawng siam meka NHIDCL hnuaia Serchhip leh Hnahthial inkar bîk kawng siam mek thlirhoin, kawng siamtu BIPL hotute chu he meeting-a tel tura sawm an nih angin an hna thawh dan chungchang sawihopui a ni a. He meeting-ah hian NHIDCL General Manager Mr.SG Dwivedy leh NHIDCL ( ABCI&BIPL) Liaisoning Officer Pu K.Lalremruata te chu an rawn tel.

Disha meeting-ah hian Serchhip leh Hnahthial inkar kawng siam mek huang chhunga compensation pawisa pek tawh, kawng siamna daltu mahni in la thiat lo engemaw zât la awmte chu kawng siam hna chak taka thawh anih theih nan an hmunhmate thiat fel thuai se an duh tih an sawi bakah, Disha meeting chairman Pu Rosanga, MP chuan kawng laihna leivung te pawh environment, lui tui tibawlhhlawh lo leh luianungchate ticherem thei tur a leivung paih lovin leivung paihna tura hmun ruat bîka leivungte paih hram hram tur leh kawng siamna hmanruate a hmun dik taka dahfel zel turin kawng siamtute a chah.

Disha meeting zawhah September ni 23, 2022 khan NHIDCL hnuaia Keitum leh Hnahthial inkar kawng siamtu BIPL te kawng siam mek chu a hmunah kalin MP Pu Rosanga chuan a enpui nghal a. Bhartia Infra Projects Ltd (BIPL) ten kawng an siam mek sawipuiin, harsatnate a awm anih chuan chutianga an harsatnate a remchan dan anga mipuite nen sawihoin mipuite tana harsatna awmlo thei ang bera hna thawh nise a duh thu a hrilh.

MP Pu C. Lalrosanga chuan kawng siam zawh hun tiama an hna thawhte zo hman ngei tura theihtawp chhuah tura a hrilh bakah, kawng siamna atana an hman leilung that leh that loh tehna, soil testing laboratory hmun te tlawhin uluk takin a enpui a. Pu Rosanga chuan kawng siamna atan hian lung thalo te hmang lovin a quality tha chauh hmang zel turin a chah bakah kawngpui tha neih theih nan kawng siam anih chhungin mipui lam leh a siamtute inkarah harsatnate a awm anih chuan chutiang harsatnate chu inhrilh tawn a, a tul leh remchan dan ang zela intawiawm tawn thin nise a duh thu a sawi a. BIPL ten kawngpui tha neih theih nana ngawrh taka hna an thawk chu lawmawm a tih thu a sawi bawk.