2070/2022-2023
Lunglei the 26th September 2022 : Vawiin khan District Veterinary Office, Conference Hall, Lunglei ah Agriculture Technology Management Agency (ATMA) Lunglei, State Agriculture Management & Extension Training Institute (SAMETI) leh National Institute of Agriculture Extension Management (MANAGE) tangkawp te buatsaihin Lunglei khawpui chhunga vawk vulh lama tuimi sawm bikte pualin karkhat chhung awh tur Skill Training on Rural Youth (STRY) hawnna neih a ni. Dr.Engkunga Chhangte, Jt. Director, Animal Husbandary & Veterinary, Southern Zone chuan khuallian niin a hmanpui.

Training hawnna inkhawm hi Dr.V.Zodinsanga, Project Director, ATMA, Lunglei chuan kaihhruaiin Khuallian Dr.Engkunga chhangte chuan thawhrimna atanga intohdelh kan tum chuan vawk vulh hi a tha ber te zinga mi a ni a ti a, Pi leh Pute atanga kan tih thin kan thiam zawng tak mizo chhungkua tam zawkin an thar chhuah hun a rei loh avanga kan phak tawk a ni a ti. Vawk vulh hi mizo rilru nen a inrem a, tunlai khawvel ah chuan nitin mai nutling patling thawkrim hian enge hlawk tih kan ngaihtuah a ngai a, Vawk hi a sa hralh mai bakah a note hralh a hlawk em em a, a buaipui a manhla a ni tiin Mizoram chhimlam mipui ten vawk vulh lamah tan lak nasat a tul hle a ni a ti. Vawk vulh tura thlan kalkhawm te pawh ti ve mai mai lova midang pawhin an dinchhuahpui theih chuan ka thei ve ang ti rilru pu chunga training hlawh tak hmang turin a chah a ni.

Training neih chhung hian Vawk vulh lama tuimi mi 20 thlan chhuah te hi mithiam Dr.Lalchhandama, Green AG, Dr.V.Zodinsanga, Project Director ATMA, Lunglei leh Dr.K.Zothanpuii, Veterinary Officer, Lunglei ten vawk vulh dan tur leh enkawl dantur zirtirna an pe dawn a ni.