No.7572/2020-2021

Saansad Adarsh Gram Yojana(SAGY) PHASE IV hnuaia MP(lLok Sabha) Model Village zinga pakhat, Muallungthu khaw hmawsawnna tura ruahmanna kalpui dan tur ngaihtuahin vawiin khan a vawi khat na atan District Level Committee chu Chairman Aizawl District Bawrhsap, Pu R.Lalramnghaka hovin DRDA Conference Hall, Khatla-ah an thukhawm a. Hmasawnna hna khawihtu sawrkar Department hrang hrang aiawh te, P.S to M.P Lok Sabha leh Muallungthu khawtlang hruaitu te an tel a ni.

SAGY PHASE IV hnuaia Muallungthu khua Model village atana kalpui turin nikum February 21 atanga March 21, 2020 chhung khan baseline survey neih a ni a. September 2020 ah Orientation training pawh neih ni tawhin nikum November 21, 2020 khan Mizoram M.P(Lok Sabha) Pu C.Lalrosanga’n Muallungthu khua chu MP Model village ah a lo puang tawh a. Covid 19 hripui leh a kaihhnawih harsatna dangte avangin model village atana ruahmanna siam leh hmalak a harsat thu he meeting ah hian tarlan a ni a. Vawiina District Level Committee thukhawm chuan Muallungthu model village atan Working Group in khawtlang hruaitute nena inrawn a an ngaih pawimawh, point 29 an chhawp chhuah te chu thlir hovin department hrang hrang te nen hmalak dan tur an sawi ho a ni.

Chairman Pu Ramnghaka chuan MP Model village awmzia sawifiahin Working Group in thil pawimawh a rawn chhawp chhuah te chu Muallungthu khawtlang hmasawnna atan an pawimawh dan te uluk taka ngaihtuah chunga hmalakna tur duan a la ni dawn a. MP model village atan hian a hranpa a sum ruahman a awm loh avangin sawrkar department ten an scheme neih sa atanga Muallungthu tana ruahmanna an siam thiam a, khawtlang mipui te pawhin a tul ang zela tha leh zung an sen a tul dawn tih a sawi a. Sawrkar leh mipui thawh hona tur a nih avang leh department hrang hrang te hmalakna inbawh thuah a awm loh nan te fimkhur tak leh thahnem ngai tak chunga thil kalpuiin Model Village tana ruahmanna mumal tak duan tur a ni tih a sawi.