No.7571/2020-2021

Home Minister Pu Lalchamliana'n vawiin khan Central YMA Hall ah CYMA in Krismas leh Kumthar vuak veta halpuah leh halmawi khapna thupek Sawrkarin a chhuah bawhzui kawnga hma la tha Branch YMA 6 an thlanchhuah te hnenah chawimawina thuziak leh tangka fai a hlan.

Home Minister chuan halpuah, halmawi leh halthlawh khapna kawngah Sawrkar leh CYMA thawhhona chu a tha hle tiin Sawrkarin khawpna thupek a chhuah leh he khapna thupek bawhzui kawnga Branch YMA hrang hrang hnathawh te chu a hlawhchham lova, chuvangin Branch hma la tha te hriatpui leh lawmpui chu tha tiin he chawimawina programme hi neih a nih thu a sawi a. Halphuah leh halmawi haltute hi man an har viau a chuvangin a halna in te pawh thubuai siamsak thei dan chu a ngaihtuahnaa a awm thu a sawi. CYMA nen tang dunin Sawrkarin kuminah chuan hma takin awareness ten en beiin hma lak a tum thu a sawi lang a. Sawrkar leh YMA in a duh loh halpuah leh halmawi hal hi ti lo tura kum bul atangin rilru leh ngaihtuahna seng turin mipuite a chah bawk a ni. 

Pu Lalchamliana chuan YMA hnathawh leh hmalakna hrang hrang te chu a hlu takzeta, YMA tangkaina hi sawi sen a ni lova, YMA hi awm ta lo sela kan khawtlang hi eng ang nge anih ang tih hi ngaihtuahtham a awm niin ka hria, a ti a. Tunhnaia CYMA in kawng siam an endiknaa hmun thenkhata hnathawh dan a lungawithlak loh thu an tarlan chu amah mimal ngaihdan chuan lawmawm a tih thu sawiin hmasawnna hnathawh kan vil zel loh chuan kan tu leh fa te tan ro tling tur kan hnutchhiah lovang tih a hlauhthawn awm a ni, a ti. Sawrkarin Home Guards hnuaia Civil Defence lamah hma lak dan a zir mek thu sawiin hma lak hunah hmun tinah YMA hi Sawrkar kut ke tur in ni dawn a ni, a ti.  Disaster Management & Rehabilitation hnuaia Aapada Mitra YMA Member 200 chuang awm mek thu pawh a sawi lang bawk a ni. 

Home Minister hian Branch YMA 6 – Bawngkawn South, Bethlehem Veng, Dinthar, Khatla West, Kulikawn leh Muthi Branch YMA te hnenah thuziak leh tangka fai a hlan a. Tangkai fai hi Minister hian ama Discretionary Fund atanga a tum a ni. 

Thusawitu dang CYMA President Pu Vanlalruata chuan hun kal tawha CYMA in hlawhtling taka hmei kawnga hma a lak dante sawiin halpuah leh halmawi hap hi kan tum chuan kan thei a, mipuiin thinlung atanga tih tak takna kan neih chu  heng halmawi leh halpuah khap hi hlawhtling thei a ni, a ti. 

He lawmman semna hun hi Pu Lalhmachhuana, Vice President CYMA in a kaihruaiin hemi kawnga CYMA in hma a lak dan te, Branch hrang hrang in he khapna thupek an bawhzui dan te leh Branch thawk tha an thlanchhuah dan te chu Prof. Lalnuntluanga,  Central YMA General Secretary hnen atangin Report ngaihthlak a ni.