Ni 10.10.2016-a Aizawl District Development Co-ordination & Monitoring Committee (Disha)-in a lo rel tawh angin vawiin khan Committee Co-Chairman Pu Ronald Sapa Tlau, MP (Rajya Sabha) hovin Aizawl District a Disha hmalakna te enfiah a ni. MP hi Pu R. Lalrinawma, Deputy Speaker chuan a tawiawm a. Aibawk Block-a Ministry of Rural Development hnuaia hmalakna hrang hrangte enfiah a ni.

MP Pu Ronald Sapa Tlau chuan Sorkar scheme hrang hrang hnuaia tanpuina dawng te hian thahnem ngaihna leh tih tak takna nen tanpuina an dawn hi hmanga an thawh chuan dinchhuahna tham vek anih thu sawiin, rilru ngil tak nen taima taka thawh a pawimawhzia a sawi a. Hmalakna hlawhtling tur chuan mipuiin heng scheme chungchangte hi an hriat chian a pawimawh thu sawiin, hmasawnna changtlung tak siam kan tum tlang tur a ni, a ti.

Vawiin hian Disha hian Aibawk RD Block-a IWMP, MGNREGS, Swachh Bharat Mission (Gramin) leh IAY scheme hnuaia hmalakna te a hmunah enfiah a ni a. Heng zingah hian Chamring a sawhthing leh aieng chinna te, Hualngo hmun a ruahtui khawlna, Water Harvesting Tank te a tel a ni. Hualngohmun a water harvesting tank hian tui litre nuai 1.6 dawng niin, chhungkua 12 in an ring a ni.

District Development Co-ordination & Monitoring Committee, Disha tia phuah hi Sorkar laipuiin kumin July ni 28 khan Sorkar laipui hmalakna hrang hrangte tha lehzual zawka kalpui a, thlumzawm an nih theih nan a din a. Central, state leh village level-ah heng hmalaknate kalpui danah inthlunzawmna tha tak siam chu he committee hian a tum pakhat niin, Ministry of Rural Development hnuaia scheme leh programme kalpui mek 28 te enfiah chu committee hian a hmasak dawn a ni.