MPF Hqrs. hruaitute ni 16.11.2009 zingkar a Rev. H Lalchhanhima, President hova thukhawm chuan ni 13.11.2009-a Tv. Zarzokima (k.17) s/o Lalngilneia, Bungthuam khua, an khaw daia rawng taka kahhlum a ni chu pawi a tiin, a dem tak zet a. Tun hnuah hetiang thil hi thleng tawh lo se a ti. Lusun chhungte a tuarpuiin, Lalpa awmpuina leh thlamuanna an neih ngei a beisei. He tualthahna a mawhphurtu leh a titute chu Sorkarin zawng chhuak a, an chungah an phu ang tawk hremna lek kawh ngei turin a duhin a beisei tlat bawk a ni.
He tualthahna avang hian Mizoram hmun hrang hrangah buaina leh harsatna a thleng chho mek a. He thil thleng avanga pawisawi lo leh nunaute tawrhna a awm lohna tur leh politics-a hamthatna tur zawnga hma la lo turin mitinte a ngen a. Mipuite pawh chi ai lo tur leh ram leh hnam timualpho thei leh tihmingchhe thei zawnga chet la lo tur leh Sorkar leh thuneitute ngaichang hram hram turin a ngen a ni.
