Vawiin chawhma dar 11 khan Don Bosco School Hall, Saiha ah All Mizoram Farmers Union (AMFU) Saiha District huaihawtin Farmers’ Meet cum NLUP Awareness Campaign neih a ni a, NLUP Implementing Board Chairman Pu R.Selthuama, MLA-in a hmanpui.

 

 

Khuallian Pu R. Selthuama chuan Mizoram Sorkarin NLUP Kalpui a tuM dan chungchang a sawifiah a, Congress Sorkar hmasak huna NLUP lo kalpui tawh dana a thalo leh famkim lo lai te chu bansana changtlung zawka kalpui tum a nih dante a tarlang a. A thawh chhoh dan turah pawh kawng hrang hranga enkawltu insiamin uluk taka vil a nih tawh tur thu te, a hralh chhuahna tur kawng te pawh ngaihtuah tel vek a nih turthu te a sawifiah bawk. NLUP chu loneitu, kuthnathawk, mi rethei leh chhumchhia te chawikan nana Sorkar ruahman a nih ang taka hlawhtlinpui ngei tum theuh turin loneitu kalkhawmte chu a chah a, Sorkar chuan a tih tur a ti ang a, a hlawhtlinna tak tak chu in kutah a awm dawn a ni, a ti. Mi dang tana thawk lovin nangmahni tana thawk tur in ni a, neitu nihna thinlung pu-a, taihmakna, tumruhna leh thawhrimna nen in beih chuan in hlawhtlinpui ngei ang tiin a fuih bawk.

Dr. Chawngkhuma Chawngthu, President, AMFU, Saiha kaihhruai Farmers’ Meet cum NLUP Awareness Campaign ah hian Saiha DC Pu Rodney Lalrinawma, Pu Lalhlawhliana, Sr. Vice President, AMFU Hqrs. Aizawl, Pu I.P. Junior, E.M., Agri, etc., MADC leh a kaihhnawih department District Officer ten loneitu te hriat tur tul leh Mhna thu te an sawi hlawm a, hriatchian loh lai inzawhfiahna hun te hman a ni bawk. Programme hmang tur hian Saiha District huam chhunga khaw hrang hrang atangin loneitu thahnem tak an kalkhawm a ni.

Pu R.Selthuama hi Aizawl lam atangin Pu Lalhmingliana, General Secretary, NLUP Implementing Board leh Pu R.Lalnunzira, Project Director, NLUP ten an rawn tawiawm a ni.