Nimin (16.5.2017) khan Mizoram Polytechnic, Lunglei chuan zirlaite thlahna hun MPL Multipurpose Hall-ah an hmang a. Parliamentary Secretary Pu Joseph Lalhimpuia chuan a hmanpui. 

Pu Joseph Lalhimpuia chuan zirlai chhuaktate chu an diploma hmuh chuan chhungkaw chawmna a pe nghal dawn lo a ni tiin, ei an zawnna kawngah mahni ke a dingchhuak tur chuan thiam thil bik an neih a tul thu a sawi a. Zirlaite chu nakin lawka kohhran, khawtlang leh ram tana mawhphurhna pawimawh tak tak chelhtu tur te an nih avangin zir tur tam tak an la hmabak thu a sawi a ni. Mizote hian kan thil tihna reng rengah kan ti thei a ni tih hi hre thar leh ila, a ti a. Rinawmna, taimakna leh tumruhna tello chuan hlawhtlinna a awm theilo a ni, a ti bawk. 

He thlahna programme hi MPSU Vice-President Benjamin Lalhlenpuia Chawngthu chuan a kaihruai a. Principal Er. B. Lalhmuakluaia chuan fuihna thu sawiin, zirlaite chu rinawmna um zel turin a chah a ni. 

Zirlai chhuak tate hi an vaiin 66 an ni a, Civil Engineering-ah mi 35, Electrical Engineering-ah mi 13, Mechanical Engineering-ah mi 6 leh Computer Science Engineering-ah mi 12 te an ni.