Vawiin chawhma khan Mizo Upa Pawl, Electric Veng Unit, Lunglei chuan an pawl kum 43 tlin lawmna chu Electric Veng Community Hall-ah an hmang a. Parliamentary Secretary Pu Joseph Lalhimpuia chuan Khuallian niin a hmanpui.

Pu Joseph Lalhimpuia chuan kan hnam nun kal zel turah Upate chu an hlu in, nasa taka thusawitu an ni tih hre thar leh tura a duh thu a sawi a. Tlawmngaihna te, aia upa zahna te, thian chhan thih ngam te kan chhiar in kan sa thin a, a taka nunpui erawh a har a ni, a ti. Chuvangin, Upate chu a nunpuitu leh a taka thangthar leh naupang te zirtir theitu an nih angin, zirtir nawn fo tura a duh thu a sawi a ni. Kan pi leh pu nundan mawi, zonun ze mawi te zirtir nawn leh kan ngai em em a ni, a ti bawk.            

He lawmna programme hi Unit President Pu R. Rozika’n a kaihruai a. Pu H. Zahranga, Secretary chuan report pe in, May Ni 16, 1975-ah Mizo Upa Pawl, Electric Veng Unit chu din a nih thu a sawi a. Bial 10-ah in then in, member 303 an awm mek thu a tarlang a ni. Pu Vanlalruata, Social Worker, National Tobacco Control Programme, Lunglei chuan zuk leh hmuam chungchangah awareness a pe a ni.

Khuallian chuan Electric Veng Unit member upa ber, Pu P. Lalbuka, kum 97 hnenah cheng 1000 hlan in, Electric Veng Unit hnenah cheng 5000 a pe bawk a ni.