No.3293/2021-2022
Aizawl 6th December 2021: MP(LS) Pu C. Lalrosanga chuan vawiin khan Parliament House, New Delhi-a a pisaah Communications, Railways, Electronic & IT Union Minister Pu Ashwini Vaishnav hmuin, Mizoram mamawh ṭhenkhat a sawipui.
MP(LS) Pu C. Lalrosanga chuan Inbiakpawhna leh internet connectivity ṭhat tawk loh thute Minister chu hrilhin a ṭhat lohna laite, a bikin ramri hrul hmunahte BSNL leh Company dangte network leh signal tihṭhat a ṭul thu a hrilh a. Pu Ashwini Vaishnav chuan Mizoram leh hmarchhak state dang ṭhenkhat harsatna leh mamawhte enfiah turin central sawrkar official-te a tirh tur thu MP chu a hrilh a ni.
Phai lam leh Mizoram inkara dak-a thil thawn a chak tawk loh ṭhin thu sawiin Pu Rosanga chuan hma la turin Communications Minister chu a ngen a. Mizorama relkawng phah mek chungchangah Railways Minister ni bawk Pu Vaishnav chuan Mizorama relkawng phahna tura leidawh leh leiverh siam hna a kal chak zawk theih nan Bairabi aṭanga Sairang thlenga relkawng phahnaa tualchhung harsatna awm ṭhinte lo enpui turin Pu C Lalrosanga chu a sawm a ni.
