393/2023-2024

Aizawl the 11th May, 2023 : Lok Sabha MP Pu C. Lalrosanga chuan ni 20 September, 2019-a 'SAGY Model Village' atana a lo thlan tawh Muthi khua chu nimin ni 10 May, 2023 khan tlawhin VDP chhunga hmasawnna hnathawh hrang hrangte a endik a. He hunah hian MP tawiawmtu Model Village Charge Officer Pi Jennifer Vanlalhruaii Pachuau, BDO, Tlangnuam chuan report pein, Sept ni 20, 2022-a din District Level Committee on SAGY Phase VII-in VDP a ruahmanah khawtlang nunphung leh mimal tin ten hma an sawn theih nan hmuh theihin nasa taka hmalak a nih dante a tarlang.

BDO Report tarlan danin Aadhar Card leh Ration Card thlunzawm te, buhfai a hun taka sem DCSO 'E' ten an kalpui dan te, Education Department lamin naupangte chhun chaw leh zirlai bu a thlawn a an sem mek te, Line Department leh zirna in te, AH & Vety Department leh SIRD&PR, Mizoram te tangkawpin Health Camp & Fertility Training an buatsaih te, SIRD&PR ten Career Guidance cum Training & Sensitization Programme an buatsaih te tarlan a ni a. Art & Culture Department-in Mizo hnamzia leh nunphung te hriat chian lehzual theih nan Mizo hnam ro thil hlui leh lehkhate phochhuakin, Cultural Outreach Programme hlawhtling taka an buatsaih chu Padma Awardee KC Runremsangi pawhin a hmanpui bakah PMJVK hnuaia ICT Department-in Awareness cum Training tha tak an buatsaih dan te Pi Jennifer-i hian a tarlang bawk.

Hun reilo te chhunga MP Model Village tana khawtlang hmasawnna hna hrang hrang - MPLADS Fund hmanga kawt lai tih en nana street light dah te, MLALADS Fund hmanga thlanmual in sak te, RD Department hnuaia MGNREGS atanga Govt. LMM Middle School kawng PCC a siam te, Tourism Department hnuaia 'Development of Eco-Adventure Circuit Aizawl-Muthi' atana in sak mek te, Solar Pumping under Muthi Water Supply Scheme bakah kawtchhuaha Village Council ten Village Map an ziah te Hon'ble MP hian a tlawh a ni.

Muthi Model Village atana thlangtu Pu C. Lalrosanga, MP (LS) chuan thu sawiin Model Village VDP a hlawhtlin theih nana nasa taka thawktu District Level Committee Chairperson Pi Vanlalhriatzuali Ralte leh a thawhpui official te bakah VC leh Working Group leh khawtlang mipuite inpekna fakawm tiin an hnathawh hlawhtlinna tam tak hmuh hian a lawmawm takzet a ni a ti. Pu Rosanga chuan Covid vangin duh angin hna a thawh theih loh zawk chu a pawi a ti a, khatiang hun harsa tawng chung pawha hetiang hmasawnna tam tak tihhlawhtlin a ni hi a lawmawmin heng bakah hian a remchan dan angin hmasawnna tur thil dangte pawh tih tum chhoh zel a ni ang a ti bawk.

Pu Rosanga hian TNT hmun pawh  tlawh nghalin MPLADS Fund hmanga TNT hmun tihzauhna lungrem hna thawh pawh a en nghal bawk a ni.