1400/2022-2023

Aizawl 28th July 2022: New Delhi-a Border Roads Organisation (BRO) hmunpuiah vawiin July ni 28 khan MP (LS) Pu C. Lalrosanga chuan Border Roads Organisation  Director General, Lt. General Rajeev Choudhary hmuin Mizorama ramri hnaih kawng sial leh siamṭhat hna chungchangte a sawipui.

MP (LS) Pu C. Lalrosanga chuan Kawnpui-Durtlang-Aizawl kawngpuia Km 10.25 a thui Durtlang Leitan-Sihphir kawng zauh leh siamṭhatna hna Mizoram PWD kuta hlanna tur pawh tifel thuai turin BRO DG chu a ngen a ni. DG BRO chuan he kawng pawimawh tak enkawlna hna hi PWD kuta hlanfel thuai tum a ni a ti a. Hnahthial-Sangau-Siaha kawngpuia Chhimtuipui Lui chunga leidawhna tur ruahman mek a ni a. He lei panna Km 1 a thui kawng siam hna tiamin leidawhna hna leh a kaihhnawih hnate atan cheng vaibelchhe 75 ruahman niin, Mizoram sawrkar aṭanga ram leh ramngaw hman phalna dawn a nih veleh sawrkar laipuiah sum mamawhte nawr zui nghal a ni ang a ti bawk.   

Pu C.Lalrosanga chuan Myanmar leh Bangladesh ramri hrul leh ramri pawhna kawngte sial leh siamṭhat a ṭul thu Border Roads hotupa chu a hrilh a. Chutiang atana ṭul ang angte chu  Ministry of Defence hotute hnen lama thlen hmasa zel turin DG chuan MP chu a ngen a ni.