1399/2022-2023

Aizawl 28th July 2022: Vawiin khan Mizoram Education Inspecting Officers' Association (MEIOA) General Conference 2022 chu Tourist Lodge Aizawl-ah neih a ni a, School Education Minister Pu Lalchhandama Ralte chuan khuallian niin a hmanpui a. Pu L.Thangmawia Vice Chairman HRD Board chu khualzahawm a ni.

Khuallian Minister Pu Lalchhandama Ralte chuan thusawiin sorkarin zirna chu ngaih pawimawh hmasakah a neih a, department dang tana thik tham khawpin sorkarin a ngai pawimawh a, thawktu lak te pawh 2500 chuang an ni tawh tih sawiin IV Grade ngawt pawh 50 chuang lak an ni tawh a ni a ti. School building leh ram te pawh humhalh a ngai a, thawktute pawh Pathianin duty a pek te missionary thinlung pua an hna hlen turin a sawm bawk. Minister chuan School Education Department chu siamțhat a ngai thu leh Zirna țha 'quality education' a awm theih nan school te chu grading pek a, chumi mil chuan private institution ah pawh fees te pawh bituk țul a tih thu a sawi. Tuna syllabus hman lai chu State dang nena khaikhinin hniam lo mahse, All India level exam-ah Mizote an la hniam avangin tihchak leh siamțhat ngai a awm tih sawiin officer te chu ngaihtuahna hmang turin a sawm bawk.

HRD Board Vice Chairman Pu L.Thangmawia pawhin he hunah hian thu a sawi a. HRD Board hnathawh dante sawiin kum hmasa lamah zirtirtute tana technology hman dan training pek chu zirtirna hnaah a țangkai hle a, zirtirtu tam takin an hmang țangkai a, zirlaiten a hlawkna an tel mek a ni a ti. Mizo language Development Board chu School Education Department hnuaiah dah a ni tih sawiin Mizo țawng tihhmasawn leh humhim chu department kutah a awm dawn a ti bawk. Pu L.Thangmawia chuan HRD Board hian Information Technology lam hawi a tum tih sawiin data pawimawh in pek nan leh teaching atan hman țangkai tum a ni tih a sawi bawk. 

MEIOA General Conference-ah hian School Education Department-a Inspecting Officers thawk laite leh pension tawh țhenkhatte an tel a, hruaitu thar an thlang nghal a ni.