2708/2022-2023
Aizawl the 17th November, 2022 : MP(LS) Pu C. Lalrosanga chuan vawiin khan New Delhi ah Union Home Secretary Pu Ajay Kumar Bhalla hmuin Mizorama tharchhuah Kuhva hring phurh leh hralhchhuah chungchang a sawipui.

MP (LS) Pu Rosanga chuan Mizoram khawthlang lama kuhva chingtuten an kuhva tharchhuah Assam lama phurhluh leh hralhchhuahna lama harsatna an tawh dante sawiin Assam a Mizoram Kuhva hring khap leh phurhte lo dang lo tura Assam sawrkar hriattir turin Home Secretary chu a ngen a. Hachhek biala kuhva chingtuten an tharchhuah Assam lamin an dan avanga bandh hial an huaihawt thute a hrilh a ni. Pu Ajay Bhalla chuan hemi chungchang thu hi an bawhzui nghal tur thu a sawi. Aizawl atanga Assam Rifles sawnchhuah chungchangah Home Secretary chuan ngun takin an ngaihtuah mek thu a sawi a. Tuna state assembly inthlan zawh lamah thu chiang a hriat theih dawn thuin a chhang a ni.

Pu C. Lalrosanga hian vawiin vek khan Defence Ministry a Joint Secretary Pu Ajay Kumar hmuin Durtlang Leitan leh Sihphir inkar kawng tihzauh leh siamthat thu a sawipui a, Ministry of Road Transport and Highways in sum an ruahman tawh ang ngeia Mizoram PWD hnenah he kawng hi hlanfel thuai turin a ngen a ni.