2709/2022-2023
Khawzawl, the 17th November 2022: Central Young Mizo Association (CYMA) leh Mizoram State AIDS Control Society (MSACS) te bultuma HIV/AIDS hluar zel tur dona kawnga hmalakna, 'Zoram Harh Rawh Campaign' kaltlanga Branch YMA te tana Mizo hnam lam leh hnam zai hmanga intihsiakna chu vawiin khan Khawzawl District Level Organising Committee on Zoram Harh Rawh buatsaihin Khawzawl Vengthar Branch YMA Hall-ah neih a ni.

Khuallian District Bawrhsap Pu C.C. Lalchhuangkima chuan Mizorama AIDS vei an pung chak chu veiawm a tih thu sawiin, India rama mihring tam zawnga chhutin vei tam berna state kan ni hi a zahthlakin inenfiah kan ngai hle a ni, a ti a. Thalaiten hnathawh leh hunawl hmanthat an tuipui a ngai tawh tak zet a, thalaite zingah tih tur nei lova awm mai mai an tam ta lutuk hi a tha lo takzet a ni, a ti a. Kan ram leh hnam hmabak thlirin insumtheihna leh thianghlimna lamah kan beih nasat lehzual a ngai dawn a ni, a ti bawk.

Dr. Lalnunpuii Renthlei, Medical Officer (Ayush) District Hospital Khawzawl chuan HIV/AIDS chungchang zirtirna a nei a. Pu Lalchhuanthanga, SP Khawzawl-in lawmthu sawiin hun a khar a ni.

Zoram Harh Rawh Campaign hnam lam leh zai hmanga intihsiaknaah hian Branch YMA 3 te an tel thei a, Khuallam leh Cheraw (Kantluang) bakah Mizo zai hmangtea inelna neih a ni a. Khawzawl Dinthar Branch YMA chu pakhatna niin, lawmman pawisafai Rs 50,000 leh thuziak cheimawi an dawng a. Pahnihna chu Vengthar Branch YMA niin, lawmman pawisafai Rs 30,000 leh thuziak cheimawi an dawng a, pathumna Darngawn Branch YMA chuan lawmman pawisafai Rs 10,000 leh thuziak cheimawi an dawng a. Intihsiaknaa pakhatna dinhmun hauhtu Dinthar Branch YMA te hi State Level intihsiaknaah Khawzawl District aiawhin an tel dawn a ni.